Лукашэнка спытаў вайскоўцаў: Якая вайна будзе ў Беларусі, калі не дай бог?
«Ваенная аперацыя» ва Украіне «шмат чаму навучыла», заявіў сёння Аляксандр Лукашэнка на нарадзе па пытанні дзяржаўнага абароннага заказу. Ён патрабуе ад вайскоўцаў вызначыцца, якая вайна будзе ў Беларусі, «калі не дай бог», і якая зброя патрэбная.
Сёння Лукашэнка правёў нараду па пытанні дзяржаўнага абароннага заказу, перадае БЕЛТА.
«Скажу шчыра, што тады мы па-іншаму бачылі і сваё войска, і перш за ўсё ўзбраенне нашага войска. І, зноў жа, абсалютна адкрыта, ваенная аперацыя Расійскай Федэрацыі ва Украіне нас многаму навучыла», — сказаў ён.
Паводле Лукашэнкі, абаронна-прамысловы комплекс зʼяўляецца адным з найважнейшых высокатэхналагічных сектараў беларускай эканомікі. «Натуральна, мы павінны абапірацца на айчыннага вытворцу ўзбраенняў», — сказаў Лукашэнка.
Вядомымі айчыннымі брэндамі застаюцца аўтаматызаваныя сродкі кіравання войскамі і зброяй распрацоўкі холдынгу «АГАТ», оптыка «Пеленга» і БелОМА, а таксама цягачы вытворчасці МЗКЦ, піша Белта. Шырокае прызнанне на сусветным рынку атрымалі створаныя беларускімі спецыялістамі радыёэлектронныя сродкі барацьбы з беспілотнымі лятаючымі апаратамі.
У той жа час Лукашэнка мяркуе, што ў пытанні ўзбраення таксама нельга перабраць з «найразумнейшымі тэхналогіямі», бо ўсё гэта павінна быць «функцыянальна для шараговых байцоў». «І ніякае кантрактнае войска ў гэтым плане нас не выратуе. Усё эфектыўна, што проста і надзейна. Вось, што самае галоўнае», — падкрэсліў ён.
Лукашэнка адзначыў, што ў войскі паступаюць найноўшыя зенітныя ракетныя комплексы «Тор-М2», радыёлакацыйныя станцыі «Праціўнік», «Сопка», «Усход», «Раса», комплексы радыёэлектроннай барацьбы «Навальніца».
Узброеныя сілы таксама атрымліваюць лёгкабраніраваныя аўтамабілі «Кайман», мадэрнізаваныя танкі Т-72.
Паводле Белта, абнаўляецца парк авіяцыйнай тэхнікі — пастаўлена і асвоена каля 30 сучасных лятальных апаратаў розных тыпаў (Су-30СМ, Як-130, Мі-8МТВ5 і іншыя). Насамрэч, той жа Як-130 — гэта проста навучальны самалёт, далёкі ад сучасных узораў расійскай, а тым больш заходняй авіяцыі.
У рамках дзяржабаронзаказу мінулага года закуплена 80 новых бронетранспарцёраў, чатыры беспілотныя авіяцыйныя комплексы, больш за дзве тысячы супрацьтанкавых кіраваных ракет, дзясяткі сродкаў кіравання войскамі і сувязі, капітальна адрамантаваныя 10 лятальных апаратаў, рапартуе БелТА.
Насамрэч, вайна ва Украіне паказала, што нават сучасная расійская тэхніка з цяжкасцю вытрымлівае сутыкненне з заходнімі ўзбраеннямі папярэдняга пакалення, не кажучы пра найноўшыя распрацоўкі. Вайна выявіла таксама, што Захад ідзе на крок наперадзе ў выкарыстанні спадарожнікавай разведкі, беспілотных апаратаў, у тым ліку ўдарных.
Каментары