У цэнтры Ліды з'явіўся мурал пра каханне, старажытныя плямёны і гарадскую культуру
На фасадзе пяціпавярховага дома па адрасе Ленінская, 17 з’явіўся мурал «Каханне». У яго аснове — гісторыя кахання хлопца і дзяўчыны з двух варожых адно аднаму плямёнаў, пераказаная ў песні «Песняроў». Героі мурала — сучаснікі, якія сімвалізуюць будаўніцтва гарадоў па прынцыпах згоды гарадской культуры і прыроды, піша Hrodna.life.
У аснове сюжэту лідскага мурала — гісторыя кахання. Калісьці гэты рэгіён быў на стыку некалькіх культур: балтаў, славян і яцвягаў — племені дайнова. Некаторыя гісторыкі лічаць, што Ліда нейкі час была цэнтрам легендарнага Дайноўскага княства. Аўтары мурала натхніліся адной з песень ансамбля «Песняры» — «Дайнова». У ёй расказана рамантычная гісторыя дзяўчыны-яцвяжкі (дайнова) і хлопца-ліцвіна, з якіх і пачалося мірнае суіснаванне раней варожых адно аднаму плямёнаў. Героямі карціны на пяціпавярховіку сталі сучасныя маладыя людзі, якія, як іх продкі, ствараюць будучыню горада на прынцыпах кахання і творчасці. У іх вобразах таксама можна ўбачыць саюз пяшчотнага прыроднага пачатку і сучаснай гарадской культуры, падкрэсліваюць аўтары.
Аўтары мурала — вулічны мастак Яўген Сасюра (Mutus) з Пінска і выпускніца аддзялення манументальна-дэкаратыўнага мастацтва Беларускай акадэміі мастацтваў Лізавета Бутрыс (Мінск). Яўген Сасюра таксама быў адным з аўтараў новага гродзенскага мурала з Каложай у бурштыне (бульвар Ленінскага камсамола) і стваральнікам мурала «За марай» 2014 года (вуліца Белыя Росы). У сваіх працах мастак камбінуе рэалістычныя вобразы і прасякнутыя сімвалізмам меланхалічныя сюжэты.
Муралы аб міфах для будучыні гарадоў
Мурал «Каханне» стаў сёмым у серыі сацыяльна-культурнага праекта «Традыцыі дзеля будучыні», прысвечанага 100-годдзю Беларусбанка. Дзесяць аўтарскіх манументальных роспісаў у розных гарадах Беларусі мастакі арт-супольнасці Urban Myths ствараюць у партнёрстве з банкам. Праз пераасэнсаванне гісторыі і фальклору аўтары імкнуцца ствараць выявы, якія б натхнялі беларусаў рухацца наперад, абапіраючыся на багаты культурны бэкграўнд краіны. Мурал на бульвары Ленінскага камсамола таксама з’явіўся ў рамках гэтага праекта.
Urban Myths (раней Signal) — супольнасць і цэнтр падтрымкі вулічных мастакоў, які імкнецца да паляпшэння гарадской прасторы ў Беларусі і павышэння актыўнасці гараджан. З 2013 года ён курыруе стварэнне манументальных мастацкіх роспісаў беларускімі і замежнымі мастакамі. Праекты Urban Myths рэгулярна трапляюць у міжнародныя агляды найлепшага сусветнага стрыт-арту. Супольнасць існуе з 2011 года, праводзіць акцыі MustAct-MustArt. За ўвесь час з праектам працаваў 31 мастак. Яны стварылі каля 50 буйных выяў у Мінску, Рагачове, Мазыры, Пінску і іншых гарадах.
Каментары
бо ў нашым раёнчыку ў гэтым годзе таксама з'явіўся мура... на тарцы шматпавярховіка ўверсе вялікі (то бок на ўвесь тарэц) чырвона-зялёны флаг карава намалявалі. ну пэўна "дызайнеры" з жкх, а хто яшчэ?
казалі мне, што дзесьці сярод тых дамоў (гэта новыя дамы) мянтоўскі дом... пэўна ён і ёсць. а можа і не адзін. бо там цэлы квартал чырвона-зялёных дамоў. я шчэ з сумам жартавала, як іх фарбавалі - о. гэта мне "на радасць" пэўна. дык мала таго - на табе шчэ й гіганцкі антыдызайнерскі флаг
- канечне не, - кажу
- ну значыць дасвідання