Ліцэй БДУ і КДБ ладзяць сумесны конкурс. У тым ліку пра Фелікса Дзяржынскага
Ліцэй БДУ разам з КДБ праводзіць культурна-патрыятычны конкурс «Першыя сярод роўных», інфармацыя пра гэта з'явілася на сайце навучальнай установы. Удзельнічаць у ім могуць выкладчыкі і ліцэісты. Свае таленты ім прапануюць праявіць у шасці намінацыях. У адной з іх, напрыклад, канкурсантаў просяць намаляваць комікс аб жыццёвым шляху і дзяржаўнай дзейнасці Фелікса Дзяржынскага, піша «Зеркала».
Конкурс праводзіцца з 1 кастрычніка па 10 снежня 2022 года. Акрамя «патрыятычнага выхавання моладзі», у яго мэты ўваходзіць:
— папулярызацыя гістарычнай спадчыны выбітнага ўраджэнца беларускай зямлі, заснавальніка ВЧК-КДБ Фелікса Дзяржынскага з дапамогай графічных раманаў (коміксаў);
— прыцягненне ўвагі моладзі да гераічнага подзвігу чэкістаў-герояў Савецкага Саюза сродкамі відэаролікаў у фармаце кароткіх відэа;
— стварэнне сучасных літаратурных, музычных і харэаграфічных твораў, у якіх на высокім мастацкім узроўні паказаны станоўчы вобраз супрацоўніка органаў дзяржаўнай бяспекі, найбольш аб'ектыўна адлюстравана дзейнасць КДБ;
— распрацоўка з выкарыстаннем IT-тэхналогій праграмных прадуктаў, якія б спрыялі развіццю цікавасці да прафесіі супрацоўніка КДБ.
Конкурс праводзіцца ў шасці намінацыях. Сярод іх «графічны раман (комікс)», «віруснае відэа», «літаратура», «музыка», «харэаграфія», «дыджытал-рашэнне».
Вось, напрыклад, што маецца на ўвазе пра «графічны раман (комікс)». У Палажэнні аб правядзенні конкурсу напісана, што тыя, хто хоча ў ім удзельнічаць, павінны падрыхтаваць маляваную гісторыю (комікс), якая б ілюстравала жыццёвы шлях і дзяржаўную дзейнасць Фелікса Дзяржынскага. У працы трэба паказаць «выдатную ролю Дзяржынскага як заснавальніка спецслужбы, выкласці самыя яркія моманты яго жыцця, цытаты і абудзіць цікавасць да далейшага вывучэння яго гістарычнай спадчыны». На ўсё пра ўсё ў канкурсантаў ёсць ад 5 да 20 старонак фармату А4. Працу можна зрабіць ад рукі, з дапамогай камп'ютарнай праграмы або сумясціўшы тое і іншае.
Вынікі конкурсу падвядуць да канца года. Узнагароджваць пераможцаў будуць 20 снежня падчас мерапрыемстваў, прысвечаных 105-годдзю органаў дзяржаўнай бяспекі. Прыз для пераможцы ў кожнай намінацыі — дыплом і 2500 рублёў.
Цяпер чытаюць
Эйсмант: Статкевіча памілавалі ўжо паўгода назад, але тады ён вярнуўся ў турму26
Каментары