Журналіста Сяргея Сацука перавялі ў калоніі «на лёгкую працу». У яго сур'ёзныя захворванні
Брат зняволенага журналіста, расказаў «Народнай Волі» пра апошнія навіны ад асуджанага на восем гадоў брата.
Сяргея Сацука затрымалі 8 снежня 2021 года. Яго абвінавацілі па трох артыкулах Крымінальнага кодэкса: «Атрыманне хабару» (арт. 430), «Распальванне варожасці» (арт. 130), «Перавышэнне ўлады альбо службовых паўнамоцтваў» (арт. 426).
У выніку Сяргей Сацук асуджаны на 8 гадоў зняволення з адбыццём пакарання ў калоніі ўзмоцненага рэжыму.
Таксама журналісту прызначылі штраф у памеры 500 базавых велічынь (16 тысяч беларускіх рублёў). Ён пазбаўлены права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў, на 5 гадоў. Акрамя таго, суд вырашыў спагнаць з абвінавачанага ў даход дзяржавы грашовую суму ў памеры 12 384 беларускіх рублёў.
Адбывае пакаранне Сяргей Сацук у калоніі №15 г. Магілёва…
— Адна з апошніх навін — брата перавялі на лёгкую працу, пра гэта ён паведаміў у лісце, — кажа Аляксандр Сацук. — У Сяргея ёсць сур’ёзныя захворванні, але, тым не менш, спачатку яго прызначылі на цяжкую працу, як абсалютна здаровага чалавека. Цяпер я дакладна не ведаю, якую работу выконвае Сяргей, але ўсё-такі не металалом цягае.
Паведамляе таксама, што апошнім часам «крыху лягчэй стала з сэрцам», хаця прыступы ўсё роўна здараюцца практычна кожны дзень.
— Ён знаходзіцца пад назіраннем турэмных медыкаў?
— Наведваецца да доктара, той выпісвае рэцэпты на пэўныя лекі.
— Ці ўсе лісты даходзяць да Сяргея?
— З маці і жонкай у іх перапіска нармальная, але вось не ведаю, ці даходзяць мае пасланні.
— Ці магчыма спатканне з блізкімі?
— У гэтым месяцы жонка Сяргея разлічвае на доўгатэрміновае спатканне, калі нічога не зменіцца. Яно запланаванае і, будзем спадзявацца, адбудзецца. А вось тэлефонны званок чамусьці адмянілі, не далі брату патэлефанаваць на гэтым тыдні.
— Суд прызначыў Сяргею вялікія грашовыя штрафы…
— Грошы ўжо сабралі, і штраф цалкам аплачаны.
Падтрымайце Сяргея: ПК № 15. 213105, г. Магілёў, п/а Вейна, Слаўгарадская шаша 183, Сяргей Віктаравіч Сацук
Цяпер чытаюць
Што робяць з беларусамі, якіх арыштавалі, але не паспяваюць асудзіць за пратэсты. Ёсць два шляхі3
Каментары