Сілавікі апублікавалі рапарты, якія ім пісала палітзняволеная Канавалава. Але яна прызнавалася ў супрацы яшчэ раней
Тэлеграм-канал ГУБАЗіКа выклаў копіі паведамленняў, якія ў калоніі пісала адміністрацыі палітзняволеная Антаніна Канавалава. Чаму іх вырашылі апублікаваць цяпер, незразумела. А яна ў адказ паабяцала «асабісты падарунак».
Першая з папер, якія паказалі сілавікі — гэта заява, напісаная ад імя Антаніны Канавалавай. У тым тэксце яна пагаджаецца добраахвотна садзейнічаць у прадастаўленні значнай інфармацыі. На фота замазаныя словы, якія сведчаць пра тое, каму ж Антаніна сабралася садзейнічаць. Сітуацыя ж адбывалася ў жаночай калоніі ў Гомелі.
Сілавікі таксама выклалі фотаздымкі аркушаў паперы з рукапісным тэкстам, які, меркавана, напісала таксама Канавалава. Там згадваюцца імёны іншых палітвязняў — Ірыны Шчаснай, Галіны Дзербыш, Наталлі Дулінай, Сафіі Сапегі. У рапартах няма інфармацыі, якая мусіла б прывесці да дадатковага пакарання таго ці іншага чалавека. Гэта апісальныя звесткі пра тое, хто што казаў і як рэагаваў на тыя ці іншыя падзеі. Дакумент дае ўяўленне пра тое, што цікавіць адміністрацыю калоніі, якія справаздачы аператыўнікі хочуць мець ад сваіх інфарматараў.
Давераная асоба Святланы Ціханоўскай Антаніна Канавалава была затрыманая 6 верасня 2020 года. Ёй прысудзілі пяць з паловай гадоў калоніі за «масавыя беспарадкі». Пасля быў арыштаваны і яе муж Сяргей Ярашэвіч. Дзеці Антаніны засталіся з бабуляй. Антаніна Канавалава выйшла па памілаванні 10 снежня 2024 года, пасля чаго з'ехала за мяжу.
Ужо ў эміграцыі Канавалава прызналася, што за кратамі ёй давялося пагадзіцца на супрацоўніцтва з адміністрацыяй калоніі.
Пасля вызвалення, калі Антаніна яшчэ знаходзілася ў Беларусі, яе, як лічыць жанчына, распрацоўвалі ў мэтах далейшага супрацоўніцтва. Канавалаву выклікалі ў ГУБАЗіК:
«Яны мне задавалі пытанні: «Ці памянялі вы свае погляды?» Вядома, я ім казала, што памяняла погляды, мне трэба было зрабіць усё, каб яны мне паверылі. Я ім казала, што мае дзеці вернуцца ў Беларусь, хаця я ўжо ведала, што яны не вернуцца».
Пазней жанчыну выклікалі на «размовы» яшчэ чатыры разы. Антаніну распытвалі пра тое, як справы ў калоніі пад кіраўніцтвам новага начальніка, прапаноўвалі знайсці ёй працу і прывезці дзяцей у Беларусь. Паводле слоў Антаніны, калі сілавікі пабачылі, што ў яе няма жадання супрацоўнічаць, яны пачалі пагражаць ёй новай крыміналкай.
На сённяшнюю публікацыю сілавікоў жанчына адрэагавала ў сваім фэйсбуку. Яна напісала, што ў той заяве пагаджалася супрацоўнічаць менавіта з адміністрацыяй калоніі, і гэтыя словы сілавікі быццам замазалі на фота. Цяпер жа, піша Антаніна, у яе атачэнні ёсць людзі, якія перадаюць сілавікам інфармацыю пра яе перасоўванні.
Канавалава абяцае навіны па сваёй справе:
«У бліжэйшы час адбудуцца незалежныя праверкі на паліграфе, да якіх я ўжо рыхтуюся. Астатняе скажуць факты. Так што чакайце, супрацоўнікі, для вас у мяне будзе асабісты падарунак».
Яна не стала тлумачыць, чаму і з якой нагоды вырашыла пайсці на паліграф.
Былая палітзняволеная Ірына Шчасная, пра якую Канавалава расказвала ў адным са сваіх рапартаў, выказалася ў яе падтрымку:
«Падтрымаю Тоню кожным словам і кожнай думкай. Гэта менавіта той чалавек, у чыім сумленні я ўпэўненая на 100 адсоткаў, бо з яе падтрымкай і дапамогай я ўсё ж прайшла самыя страшныя часы ў катавальні №4. Дзякуй табе, даражэнькая. Мы разам!»
«Наша Нiва» — бастыён беларушчыны
ПАДТРЫМАЦЬ
Каментары
Тертель за это должен лично возбудить уголовное дело и утвердить их задержание.