Сям'я збіралася паехаць на мора, але сына праз мяжу не прапусцілі. Яго пашпарт забракавалі па незвычайнай прычыне
Пашпарт, у які малады хлопец атрымаў візу ад пасольства і які правярала візавае агенцтва, не спадабаўся беларускім памежнікам.
Як распавядае Onliner, 19-гадовы хлопец збіраўся разам з сям'ёй на мора, дзе яны не былі 6 гадоў. Спецыяльна для гэтага студэнт некалькі месяцаў падпрацоўваў, каб адразу пасля сесіі паехаць у падарожжа.
Сям'я атрымала грэцкую візу і калідор знаходжання ў 16 дзён. Ехалі яны на машыне праз брэсцкую частку мяжы. Пасля доўгага чакання там і ўзнікла праблема з пашпартам.
Нягледзячы на тое, што дакумент ужо бачыла і візавае агенцтва, і пасольства, ён не спадабаўся беларускім памежнікам. Справа ў тым, што пашпарт выдавалі маладзёну ў 13 гадоў, а цяпер яму 19 — хлопца амаль не пазнаць. Па тэрмінах пасведчанне асобы было дзейным.
«На фота сыну 13 гадоў, 146 сантыметраў, зусім дробны быў. Цяпер яму 19 гадоў, рост ужо 187 сантыметраў. Ну вядома, і розніца ва ўзросце таксама бачная. Але пашпарт жа сапраўдны па тэрмінах. Калі б хоць бы ў агенцтве, дзе візы рабілі, або ў амбасадзе нам сказалі, што фота не адпавядае правілам, вядома ж, мы абнавілі б пашпарт», — распавяла Onlíner мама хлопца Юлія.
Пазней памежнікі вырашылі, што фота таксама мае дрэнную якасць — здымак ім здаўся недакладным і каламутным.
Па выніку хлопцу выпісалі штраф у 42 рублі па артыкуле аб прад'яўленні несапраўднага дакумента (арт. 23.31 КаАП), анулявалі і канфіскавалі пашпарт, а потым — развярнулі назад у Беларусь.
«У мяне пачалася істэрыка, выклікалі начальніка змены. Што я толькі ні казала, упрошвала, усе паперы (квіткі на самалёт, бронь гатэля) паказала… але яго не прапусцілі. Яшчэ і мне хацелі даць штраф за тое, што істэрыла на мяжы. Усе плакалі. Я таксама збіралася з ім вярнуцца. Але ён пачаў угаворваць мяне: мама, вы ляціце, А я сам як-небудзь дабяруся да Мінска», — расказала жанчына.
У падарожжа паехалі толькі мама з татам. Сям'я плануе звярнуцца ў амбасаду, каб аднавіць візу ўжо ў новым пашпарце. Але такой працэдуры, удакладняюць журналісты, няма — трэба пачынаць увесь працэс наноў.
Каментары
А Греция никуда не денется.
Жаль, что родители не смогут быть на проводах в армию, но это ничего. Полтора года пролетят быстро.