Найноўшы экзашкілет ад German Bionic дапамагае медычным работнікам падымаць пажылых пацыентаў
Apogee+ імкнецца спрасціць задачы для медсёстраў і сумежных спецыялістаў.
Стартап German Bionic, які займаецца стварэннем экзашкілетаў, прэзентаваў абнаўленне свайго лёгкага экзакасцюма Apogee. Абноўленая мадэль Apogee+ прызначаная спецыяльна для медычных работнікаў і робіць нашмат прасцейшым догляд за пацыентамі, асабліва пажылымі і нямоглымі. Кампанія спадзяецца знізіць «велізарны ўзровень стрэсу», з якім сутыкаюцца гэтыя працаўнікі.
Apogee+ распрацаваны як «персанальны памочнік для пад’ёму», які аказвае актыўную дапамогу ў пад'ёме і перамяшчэнні пацыентаў для розных санітарных працэдур, напрыклад, паходу ў душ ці перамяшчэння з крэсла-каталкі ў ложак. Робат-касцюм забяспечвае аблягчэнне амаль у 32 кг пры пад’ёме пацыента, здымаючы нагрузку са спіны працаўніка. Таксама экзашкілет уключае ў сябе ўбудаваныя захваты для стабільнага ўтрымання і змены становішча пацыента, паведамляе Engaget.
Як і папярэдняя мадэль, Apogee+ невялікі і лёгкі, таму яго могуць насіць розныя людзі ў самых розных умовах. Ён таксама вода– і пыланепранікальны, што павінна дапамагчы пры купанні пацыентаў ці калі працаваць даводзіцца ў дрэнных санітарных умовах.
Большасць прадуктаў German Bionic распрацаваная для прамысловых умоў. Напрыклад, магутны экзашкілет Cray X дазваляе лёгка падымаць і пераносіць тыя ж 30 кг; мае поўную падтрымку як ног, так і спіны, а таксама мае магчымасць замены акумулятара без неабходнасці здымання самога касцюма, дзякуючы чаму яго можна насіць поўную працоўную змену.
Apogee+ распрацаваны спецыяльна для медычных клінік, таму цэльны корпус касцюма дазваляе лёгка дэзынфекаваць яго. Гэта відавочна вельмі важна для любых медычных устаноў.
У каго ёсць магчымасць патрапіць у Германію, той зможа на сабе паспрабаваць навінку ў лістападзе. Кампанія прапануе асабістыя дэманстрацыі на глабальнай медычнай выставе Medica, якая адбудзецца 13—16 лістапада ў Дзюсельдорфе. Кошт касцюма — 9900 даляраў, або 299 даляраў у месяц згодна са спецыяльнымі ўмовамі для аптовых пакупнікоў.
Цяпер чытаюць
У Беларусі множацца пляцоўкі для танцаў на свежым паветры — паглядзіце, як адпальваюць разам моладзь і пенсіянеры ў Серабранцы7
Каментары