Najnoŭšy ekzaškilet ad German Bionic dapamahaje miedyčnym rabotnikam padymać pažyłych pacyjentaŭ
Apogee+ imkniecca spraścić zadačy dla miedsiostraŭ i sumiežnych śpiecyjalistaŭ.
Startap German Bionic, jaki zajmajecca stvareńniem ekzaškiletaŭ, prezientavaŭ abnaŭleńnie svajho lohkaha ekzakaściuma Apogee. Abnoŭlenaja madel Apogee+ pryznačanaja śpiecyjalna dla miedyčnych rabotnikaŭ i robić našmat praściejšym dohlad za pacyjentami, asabliva pažyłymi i niamohłymi. Kampanija spadziajecca źnizić «vielizarny ŭzrovień stresu», ź jakim sutykajucca hetyja pracaŭniki.
Apogee+ raspracavany jak «piersanalny pamočnik dla padjomu», jaki akazvaje aktyŭnuju dapamohu ŭ padjomie i pieramiaščeńni pacyjentaŭ dla roznych sanitarnych pracedur, naprykład, pachodu ŭ duš ci pieramiaščeńnia z kresła-katałki ŭ łožak. Robat-kaścium zabiaśpiečvaje ablahčeńnie amal u 32 kh pry padjomie pacyjenta, zdymajučy nahruzku sa śpiny pracaŭnika. Taksama ekzaškilet uklučaje ŭ siabie ŭbudavanyja zachvaty dla stabilnaha ŭtrymańnia i źmieny stanovišča pacyjenta, paviedamlaje Engaget.
Jak i papiaredniaja madel, Apogee+ nievialiki i lohki, tamu jaho mohuć nasić roznyja ludzi ŭ samych roznych umovach. Jon taksama voda– i pyłaniepranikalny, što pavinna dapamahčy pry kupańni pacyjentaŭ ci kali pracavać davodzicca ŭ drennych sanitarnych umovach.
Bolšaść praduktaŭ German Bionic raspracavanaja dla pramysłovych umoŭ. Naprykład, mahutny ekzaškilet Cray X dazvalaje lohka padymać i pieranosić tyja ž 30 kh; maje poŭnuju padtrymku jak noh, tak i śpiny, a taksama maje mahčymaść zamieny akumulatara bieź nieabchodnaści zdymańnia samoha kaściuma, dziakujučy čamu jaho možna nasić poŭnuju pracoŭnuju źmienu.
Apogee+ raspracavany śpiecyjalna dla miedyčnych klinik, tamu celny korpus kaściuma dazvalaje lohka dezynfiekavać jaho. Heta vidavočna vielmi važna dla lubych miedyčnych ustanoŭ.
U kaho jość mahčymaść patrapić u Hiermaniju, toj zmoža na sabie pasprabavać navinku ŭ listapadzie. Kampanija prapanuje asabistyja demanstracyi na hłabalnaj miedyčnaj vystavie Medica, jakaja adbudziecca 13—16 listapada ŭ Dziusieldorfie. Košt kaściuma — 9900 dalaraŭ, abo 299 dalaraŭ u miesiac zhodna sa śpiecyjalnymi ŭmovami dla aptovych pakupnikoŭ.
Ciapier čytajuć
Łukašenka daručyŭ Kubrakovu razabracca z tymi, chto pje kavu na AZS, i navieści tam «žalezny paradak»14
Łukašenka daručyŭ Kubrakovu razabracca z tymi, chto pje kavu na AZS, i navieści tam «žalezny paradak»
«Ja ich ni pra što nie prasiŭ i tym bolš — vysyłać mianie z radzimy». Departavanyja palitviaźni rezka adkazali Kavaleŭskamu. Nie abyšłosia biez abrazaŭ3535
Kamientary