Беларускага і расійскага паслоў усё ж пазвалі на ўручэнне Нобелеўскай прэміі міру
Кіраўніцтва Нобелеўскага фонду вырашыла не запрашаць паслоў Расіі, Беларусі і Ірана на цырымонію ўручэння Нобелеўскай прэміі ў Стакгольме. Аднак усе паслы, як і раней, будуць запрошаныя на цырымонію ў Осла, паведамляе Нобелеўскі камітэт.
«Нарвежскі нобелеўскі камітэт мае 70-гадовую традыцыю запрашаць усіх замежных паслоў у Осла на цырымонію ўручэння Нобелеўскай прэміі міру 10 снежня. Камітэт жадае, каб дзяржаўныя органы кожнай краіны, афіцыйна прадстаўленыя ў Нарвегіі, мелі магчымасць узяць удзел у цырымоніі ўзнагароджання і азнаёміцца з важнымі пасланнямі лаўрэатаў Нобелеўскай прэміі міру», — тлумачыць Нобелеўскі камітэт.
«Гэта не ў апошнюю чаргу адносіцца да краін з аўтарытарным рэжымам, якія вядуць вайну супраць іншых краін або супраць уласнага насельніцтва і супраць якіх выступаюць нашы лаўрэаты прэміі міру», — падкрэсліў Нобелеўскі камітэт.
Нагадаем, што запрашэнне паслоў пералічаных краін на цырымоніі ўручэння прэмій у Стакгольме выклікала крытыку. Абурыліся ў Швецыі, Украіне, а таксама дэмакратычныя беларускія сілы. У суботу Нобелеўскі камітэт заявіў, што не будзе запрашаць паслоў.
Год таму, у кастрычніку 2022 года, Нобелеўскую прэмію міру прысудзілі беларускаму праваабаронцу Алесю Бяляцкаму, які быў затрыманы падчас пагрому беларускіх праваабаронцаў 14 ліпеня 2021 года. Замест Бяляцкага прэмію ў Осла атрымала яго жонка Наталля Пінчук. У сакавіку 2023 года Алеся Бяляцкага асудзілі на 10 гадоў калоніі.
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа31
Каментары