«Трэба ўявіць Сізіфа шчаслівым». Выйшла новая кніга Валянціна Акудовіча
Фаліянт амаль у 400 старонак аўтарства аднаго з найуплывовейшых філосафаў Беларусі быў надрукаваны ў выдавецтве «Логвінаў». Гаворка ідзе пра кнігу Валянціна Акудовіча «Трэба ўявіць Сізіфа шчаслівым. Хронікі беларускага інтэлектуала», піша Reform.by.
Над гэтым выданнем Валянцін Акудовіч працаваў не адзін год. Некалькі год запар фрагменты кнігі друкаваў часопіс «Дзеяслоў».
«Перадусім гэта кніга пра стварэнне дыскурсу сучаснага беларускага мыслення і герояў, якія яго стваралі, — пракаментаваў выхад доўгачаканага праекта ў сацсетках сам аўтар. — Ды гэтая кніга шмат пра што і пра каго, але найперш яна пра стваральнікаў… Пра тых, хто дабрахоць падняў з поду і ўскінуў сабе на плечы цяжар, які ён называе «мая краіна». З дня ў дзень яны рушаць з гэтым цяжарам усё вышэй і вышэй, каб аднойчы ўбачыць, як камень з грукатам зноў скоціцца долу. А значыць трэба яшчэ раз вяртацца да пачатку пачаткаў… І мы вяртаемся!»
Валянцін Акудовіч — беларускі філосаф, эсэіст, літаратурны крытык. Аўтар такіх кніг, як «Мяне няма. Роздумы на руінах чалавека» (1998), «Разбурыць Парыж» (2004), «Дыялогі з Богам» (2006), «Код адсутнасці. Асновы беларускай ментальнасці» (2007), «Кніга пра нішто» (2012), «Прачнуцца ранкам у сваёй краіне» (2015).
Набыць новую кнігу Валянціна Акудовіча неўзабаве можна будзе праз пляцоўкі выдавецтва «Логвінаў».
Пракуратура пра смерць Мелказёрава: журналіст меў хранічную хваробу17
Каментары