Чацвёртакласнік у Віцебску «пракачаўся» ў анлайн-гульні, скраўшы грошы ў настаўніцы
Чацвёртакласнік адной са школ Віцебска вырашыў павысіць свой рэйтынг у анлайн-гульні — і абраў для гэтага крымінальны метад. Як на тое, настаўніца якраз забылася ў класе картку.
Настаўніца пачатковых класаў пасля ўрока спяшалася на нараду і забылася ў класе асабістыя рэчы. Сярод іх была банкаўская картка. Неўзабаве пластык педагогу прынесла калега, і гісторыя забылася, піша выданне «Віцьбічы».
Але праз некаторы час настаўніца вырашыла памяняць картку і выявіла, што з рахунку зніклі 900 рублёў. Спачатку жанчына западозрыла ў крадзяжы супрацоўнікаў банка — і напісала на іх заяву ў міліцыю.
Аказалася, што работнікі банка ні пры чым. Грошы з карткі вывеў чацвёртакласнік той жа школы. Ён убачыў забыты настаўніцай пластык і сфатаграфаваў яго. А затым выкарыстаў даныя для папаўнення свайго рахунку ў анлайн-гульні.
Бацькам хлопчыка цяпер прыйдзецца вярнуць настаўніцы грошы. У міліцыі адзначылі, што педагог не падключыла паслугу 3D-Secure — калі б абарона працавала, то школьнік не змог бы выкрасці грошы з карткі.
Цяпер чытаюць
За «экстрэмісцкія» падпіскі пры праверцы на мяжы больш не саджаюць на суткі15
Каментары