«Не бачыла нават столькі». Дзяўчына публічна прадэгуставала ажно 15 відаў рагачоўскай згушчонкі

У першым відэароліку дзяўчына прадэгуставала згушчаныя вяршкі, класічную, абястлушчаную згушчонкі, а таксама экзэмпляры з водарам какосу і «Ірландскі крэм».

@hanna.dmitrieva 1 часть. #обзор ♬ оригинальный звук - HD

Фаварытам беларускі ў першым роліку стала абястлушчаная згушчонка, якая, на думку аўтаркі відэароліка, прыйшлася ёй даспадобы больш лёгкай версіяй класічнай згушчонкі і вяршкоў.

Карыстальнікі сацсеткі здзівіліся таму факту, што ў вядомага вытворцы згушчонкі настолькі шырокая лінейка прадукту.

«Іх так шмат?! Чаму да нас толькі базавая?», — здзівіўся і задаўся пытаннем адзін з каментатараў.

«Ну і дзе іх столькі знайсці? Хоць ты едзь у Рагачоў», — яшчэ адзін каментар пад відэа.

«А дзе такі асартымент яе знайшлі? Не бачыла нават столькі. І не ведала, што яна такая бывае», — напісала пад відэаролікам адна карыстальніца.

На гэта аўтарка адказала, што купіла ўсе экзэмпляры ў фірмовай краме ў Рагачове, але «такія ж крамачкі ёсць і ў іншых гарадах, напрыклад, у Гомелі».

Таксама каментатары заўважылі, што многія віды рагачоўскай згушчонкі можна знайсці на папулярным маркетплэйсе Wildberries.

У другім відэароліку дзяўчына прадэгуставала лінейку варанай згушчонкі. Іх усяго 4: класічная «Ягорка», «Іванушка» з какавай, «Антошка» з кавай і «Алёнушка» з цыкорыяй.

@hanna.dmitrieva 2 часть. обзор, который мы заслужили #обзор ♬ оригинальный звук - HD

Больш за ўсё аўтарка відэа ацаніла класічную версію «Ягоркі», але і «Алёнушка» з цыкорыяй падалася ёй вартай увагі. А вось кававага «Антошку» беларуска, па яе прызнанні, у такім выглядзе «есці б не стала», і лепш разбавіла б яго малаком.

Карыстальнікі сацсеткі з меркаваннем дзяўчыны пагадзіліся не ўсюды. Хтосьці лічыць, што класічны «Ягорка» нагадвае жэлацін, а некаторыя высока ацанілі кававы варыянт.

«Кававую люблю! Раблю з ёй пірожнае «бульба», і гэта любоў», — напісала адна з карыстальніц у каментарах.

У трэці агляд трапілі згушчонкі з рознымі смакамі. Беларуска паспрабавала «Лясны арэх», «Ваніль і вяршкі», «Каву», «Цыкорыю», «Какаву», а таксама згушчонку з фруктозай, якая нагадала «густы заварны крэм з торта».

@hanna.dmitrieva 3 часть. финальная) #обзор ♬ оригинальный звук - HD

Дарэчы, у агляд беларускі ўсё ж такі трапілі не ўсе смакі згушчонкі з Рагачова. Так, там не аказалася згушчонкі з водарам «Топленае малако» і з цукрам Халяль, якія таксама выпускае прадпрыемства.

Многія каментатары папрасілі агляд і на лінейку згушчонкі з Глыбокага, дзяўчына напісала: «Значыць, трэба зрабіць агляд і на глыбоцкую».

• 5
• 0
• 1
• 1
• 1
• 0
• 4
• 0