Брэнд збанкрутаванай сеткі «Востраў чысціні і смаку» новыя ўласнікі абяцаюць захаваць
Нараду з нагоды будучыні калісьці найбуйнейшай сеткі правялі ў Міністэрстве антыманапольнага рэгулявання і гандлю.
На сустрэчы прысутнічалі міністр Аляксей Багданаў і прадстаўнікі сеткі, у тым ліку яе ранейшы ўладальнік Віктар Рамук.
Прадстаўнікі рэтэйла праінфармавалі пра планы па захаванні брэнда «Востраў чысціні і смаку», а таксама пра работы па развіцці абноўленай гандлёвай сеткі, якім будзе займацца новы ўласнік брэнда.
Паколькі арганізацыі групы кампаній «Ромакс», якая валодала сеткай, праходзяць працэдуру банкруцтва, Багданаў звярнуў увагу на неабходнасць максімальнага ўліку інтарэсаў усіх зацікаўленых, у тым ліку крэдытораў, адзначылі ў МАРГ.
Нагадаем, што нядаўна стала вядома пра поўнае закрыццё сеткі «Востраў чысціні і смаку». Пры гэтым яшчэ ў красавіку ўладальнік сеткі Віктар Рамук быў настроены аптымістычна — ён расказваў, што знайшоў расійскага інвестара і збіраецца адкрыць крамы, у тым ліку па франшызе.
У верасні 2022 года з'явілася інфармацыя пра затрыманне гендырэктара «Вострава чысціні» Віктара Рамука. Праз год ягоны бізнэс быў на мяжы банкруцтва: крыніцы «Нашай Нівы» сцвярджалі, што велізарны выкуп за выхад уласніка з СІЗА і праблемная бізнэс-мадэль пагражаюць кампаніі закрыццём.
Цяпер чытаюць
Ціханоўскі адказаў Ціханоўскай: Чамусьці не згадваецца, што рэабілітацыя сына адбывалася ў кватэрах і дамах, якія я купіў104
Каментары