У Нідэрландах адродзяць створаны беларусам аўтамабільны брэнд

У Нідэрландах адраджаюць створаны ў XX стагоддзі беларусам Якавам Саўчыкам аўтамабільны брэнд кузавабудавання Saoutchik, які быў папулярны ў 1920—1940-х гадах, піша выданне «Беларусь і свет».

Як сказана на сайце кампаніі Saoutchik BV са штаб-кватэрай у горадзе Хіпаліцюсхуф у правінцыі Паўночная Галандыя, яе партнёрамі 18 жніўня 2016 года набыты эксклюзіўныя правы на гандлёвую марку Saoutchik.

Асноўная місія новага атэлье — адрадзіць і ўмацаваць успрыманне брэнда, вярнуўшы яго ў сённяшні дзень з дапамогай вытворчасці раскошных аўтамабіляў, напоўненых гістарычнай настальгіяй і эмоцыямі.

Кампанія забяспечыць поўны цыкл стварэння эксклюзіўных аўто па індывідуальных заказах і абмежаванымі серыямі: ад эскізнага праекта кузава да ўласна яго ўстаноўкі і камплектавання на шасі-донары.

Як тлумачаць у новым атэлье, машыны «будуць нагадваць аналагічныя аўтамабілі абмежаванай зборкі 1920—1950-х гадоў, якія былі даступныя вельмі нешматлікім багатым, паспяховым і знакамітым».

Першы праект — родстар

Пілотным праектам кампаніі стане Saoutchik 300gtc Roadster. У апісанні сказана, што гэта «шэдэўр ручной працы», які ўвасабляе ў сабе «стыль, тэхналогіі і інжынерную дасканаласць, і які захоўвае ўвесь дух культавага Mercedes 300 SL».

Каманда дызайнераў і інжынераў студыі Ugur Sahin Design, натхнёная класічным аўтамабілем Mercedes-Benz, «скрупулёзна працавала над пераасэнсаваннем канцэпцыі і стварэннем новага ўзору сучаснага дызайну».

На ручную зборку машыны пайшло больш за 4 тысячы гадзін працы майстроў-рамеснікаў і тэхнікаў. Кузаўныя панэлі са стоадсоткавага вугляроднага валакна будуць выраблены прадпрыемствам Pogea Racing.

У спалучэнні з 5-восевай апрацоўкай металу ад Saoutchik на станках з лічбавым праграмным кіраваннем гэта дазволіць дасягнуць «дакладнасці, якая супернічае з любымі серыйнымі аўто».

Абмежаваная серыя ў 15 машын нацэлена на калекцыянераў. Перад зборкай кожнага аўтамабіля будучы ўладальнік кансультуе каманду дызайнераў, каб атрымаць унікальнае тварэнне, падыходнае яму і яго ладу жыцця.

Хто такі Якаў Саўчык

Якаў Саўчык, або, калі чытаць па-французску, Жак Саўчык, нарадзіўся ў 1880 годзе ў Койданаве (цяпер гэта Дзяржынск у Мінскай вобласці). Сапраўднае ж яго імя было Якаў Саўчук.

Беларус эміграваў з сям'ёй у Францыю каля 1899 года, дзе трохі і змяніў прозвішча для большай мілагучнасці. Будучы чырванадрэўшчыкам, ён заняўся новым бізнэсам — рабленнем на заказ кузаваў для «легкавікоў».

У той перыяд аўтамабільныя кампаніі рабілі толькі шасі, а кузаў пакупнік звычайна заказваў аднаму з шматлікіх кузаўшчыкаў. Хоць паступова пачынала развівацца і канвеерная вытворчасць машын «пад ключ».

У 1906 годзе Саўчык адкрыў майстэрню ў Нёі-сюр-Сен — прыгарадзе Парыжа. І, дзякуючы высокай якасці і экстравагантнаму стылю, дамогся папулярнасці ў багатых кліентаў, зрабіўшы фірму адной з вядучых.

Яго кузавы, аздобленыя бліскучымі дэкаратыўнымі дэталямі, ставіліся на шасі прэстыжных марак — Bugatti, Delahaye, Pegaso, Bucciali, Isotta Fraschini, Hispano-Suiza, Duesenberg… але пасля Другой сусветнай попыт упаў, і ў 1955 годзе майстэрня зачынілася.

• 19
• 0
• 0
• 1
• 2
• 0
• 0
• 2