Хто тая жанчына, якая прымае дакументы ў кандыдатаў у прэзідэнты і дзяжурна дакладвае пра сумленнасць выбараў?
Алена Грыгаровіч — адзін з новых твараў беларускага Цэнтрвыбаркама. Расказваем, хто яна і адкуль узялася.
Прымаць дакументы ў падкантрольных Лукашэнку прэтэндэнтаў у кандыдаты даручылі юрыстцы Алене Грыгаровіч. Яна ж на пасяджэннях агучвае перад членамі камісіі загадзя падрыхтаваны прысуд: чые дакументы ў норме, а каго з прэтэндэнтаў варта адсеяць.
Алене Грыгаровіч 39 гадоў. Родам яна з Маладзечна. Пасля школы пераехала ў Мінск і адвучылася на юрфаку БДУ. Па звестках «Белпола», сям'я жанчыны не мае аніякіх адметнасцяў. Муж працаваў у банку, бацькі таксама на звычайных працах.
З адметных фактаў, якія адшукала аб'яднанне былых сілавікоў пра Алену — яна ў 2020 годзе ездзіла ва Украіну разам з намеснікам начальніка ўпраўлення прававога забеспячэння Следчага камітэта Беларусі, палкоўнікам юстыцыі Сяргеем Паплаўскім. Праўда, невядома, ці магло сяброўства з ім паўплываць на кар'еру Алены.
Па звестках праекта Digital intelligence team, Грыгаровіч з 2008 года працавала ў Галоўным упраўленні юстыцыі Мінскага аблвыканкама. Спачатку кансультанткай у судзе Вілейскага раёна, пасля на іншых пасадах унутры структуры. У выніку дарасла да пасады начальніцы ўпраўлення арганізацый прававога абслугоўвання.
Раней у медыя Грыгаровіч не свяцілася. Яна ўдзельнічала ў дзяжурных семінарах для юрыстаў і пасяджэннях Міністэрства юстыцыі, але не болей за тое.
У 2023-м жанчыну чакаў рост — яе ўзялі працаваць у ЦВК. Ды не проста ў ЦВК, а адразу на пазіцыю начальніка аддзела прававой, метадычнай і аналітычнай работы апарата ЦВК. Цяпер менавіта яна дзяжурна абвяшчае пра «адсутнасць фальсіфікацыяў» падчас выбараў і перыядычна каментуе нешта дзяржаўным медыя.
На гэтай пасадзе яна паспела выступіць з прамовай «Сучасныя тэхналогіі працы з выбаршчыкамі: досвед Рэспублікі Беларусь». Адбылося гэта на семінары ў Расіі, які называўся «Абарона электаральнага суверэнітэту краінаў СНД». Таксама ездзіла назіраць за выбарамі ў Казахстан.
Падобна, што Грыгаровіч вучыцца або выкладае ў Акадэміі кіравання пры Лукашэнку — па звестках DIT, пазнака пра гэта ёсць у базе ФСЗН.
«Наша Нiва» — бастыён беларушчыны
ПАДТРЫМАЦЬЦяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары