Кіраўнік нямецкай разведкі: Расія можа напасці на краіны Балтыі або атакаваць архіпелаг Шпіцберген

«Расія рыхтуецца да вайны з Захадам», — заявіў кіраўнік Федэральнай разведвальнай службы Германіі (BND) Бруна Каль, спаслаўшыся на даныя разведкі. Па яго словах, якія цытуе Berliner Zeitung, пра гэта сведчаць шматлікія фактары.

Па-першае, узровень вайсковых выдаткаў у Расіі шматкроць перавышае аналагічныя выдаткі на Захадзе. Па-другое, у краіне праводзіцца рэарганізацыя вайсковых акруг, а штогод у армію набіраюць сотні тысяч новых кантрактнікаў.

Па-другое, падкрэсліў Каль, расійскія войскі набылі значны баявы вопыт у ходзе вайны ва Украіне, а таксама ўдасканалілі навыкі прымянення новых тэхналогій, уключаючы дроны, штучны інтэлект і планерныя бомбы старога тыпу. Акрамя таго, Расія атрымала досвед уздзеяння на заходнія спадарожнікі ў космасе.

З 2022 года ў краіне назіраецца ўзмоцненая мілітарызацыя грамадства. Гэта праяўляецца, напрыклад, у нацыяналістычных праграмах, якія ўкараняюцца ў школах і ўніверсітэтах.

Да канца бягучага дзесяцігоддзя, на думку Каля, Расія можа дасягнуць узроўню, які дазволіць ёй атакаваць Захад. Аднак, як мяркуе кіраўнік Федэральнай разведвальнай службы Германіі, перад тым, як перайсці да адкрытага ваеннага канфлікту, Масква паспрабуе падарваць абавязацельствы саюзнікаў па НАТА па аказанні дапамогі, замацаваныя ў артыкуле 5 дамовы аб альянсе.

Як патлумачыў Каль, Расія хоча дасягнуць сітуацыі, пры якой, калі яна атакуе члена альянса, іншыя дзяржавы-члены не разглядалі б гэта як напад на ўвесь альянс. Тады Расія дасягнула б сваёй мэты: развалу НАТА як абароннага альянсу.

У якасці магчымых сцэнараў першых дзеянняў Расіі Каль назваў з'яўленне нейкай колькасці «зялёных чалавечкаў» у краінах Балтыі пад маркай абароны расейскамоўнай меншасці або «невялікую карэкціроўку тэрыторыі» на архіпелагу Шпіцберген. Такія дзеянні, паводле слоў кіраўніка Федэральнай разведвальнай службы Германі, стануць праверкай гатоўнасці НАТА і здольнасці альянсу супрацьстаяць ціску Расіі.

Акрамя гэтага, як мяркуе Каль, Расія будзе працягваць выкарыстоўваць метады «гібрыднай вайны» для ўздзеяння на грамадскую думку і палітычную сітуацыю ў розных краінах Еўропы, каб падарваць адзінства альянсу яшчэ да пачатку буйнамаштабнага канфлікту.

На думку кіраўніка Федэральнай разведвальнай службы Германі, Расія зыходзіць з дапушчэння, што Захад, сутыкнуўшыся з мноствам крызісаў, будзе адчуваць цяжкасці ў пошуку ўзгодненых адказаў.

Эксперты BND таксама мяркуюць, што ў расійскім Міністэрстве абароны існуюць сумневы адносна таго, наколькі надзейныя абавязацельствы НАТА па калектыўнай абароне і пашыранай сістэме стрымлівання ЗША ў выпадку пагрозы Еўропе.

«На гэты момант няма канкрэтных даных пра ваенныя намеры Расіі, — удакладніў Каль, — аднак, калі падобныя погляды пачнуць пераважаць у маскоўскіх кіроўных колах, рызыка ваеннага сутыкнення ў бліжэйшыя гады істотна ўзрасце».

У гэтым кантэксце Каль папярэдзіў: «Актывізацыя Расіяй гібрыдных дзеянняў павялічвае рызыку таго, што НАТА ўрэшце разгледзіць магчымасць прымянення свайго артыкула 5 аб узаемнай абароне».

На заўвагу, што Расія сутыкаецца з эканамічнымі праблемамі, масавым адтокам насельніцтва, а за два гады не здолела нават захапіць тэрыторыі Украіны, якія хацела забраць, Каль адказаў, што галоўная задача цяпер — стрымліванне.

«Размова ідзе пра далейшае стрымліванне, каб расійскія сілы заставаліся звязанымі ва Украіне як мага даўжэй. Калі мы цяпер паддамося моцнаму жаданню [ўстанавіць] мір [любой цаной, нават калі ён выгадны для Масквы], Расія зможа прадоўжыць нарошчваць узбраенне, і тады Пуцін даб'ецца перамогі», — падкрэсліў кіраўнік Федэральнай разведвальнай службы Германіі.

• 29
• 1
• 2
• 2
• 1
• 1
• 3
• 0