Супрацоўніка нямецкай разведкі западозрылі ў шпіянажы на карысць Расіі
Супрацоўнік Федэральнай разведвальнай службы Германіі Карстэн Л. (Carsten L.) затрыманы па падазрэнні ў дзяржаўнай здрадзе, у прыватнасці ў шпіянажы на карысць Расіі. Затрыманне адбылося 21 снежня і было санкцыянавана Федэральнай пракуратурай ФРГ, паведамляе Deutsche Welle.
Неўзабаве пасля гэтага стала вядома, што следчы суддзя Федэральнай судовай палаты яшчэ 16 снежня выдаў ордар на арышт Карстэна Л. Цяпер таго папярэдне затрымалі.
Сёлета падазраваны перадаў «адной з расійскіх спецслужбаў» звесткі, якія ўяўляюць сабой дзяржаўную таямніцу.
У яго жыллі і на працоўным месцы ўжо прайшлі ператрусы, заявілі ў сваю чаргу ў Федэральнай пракуратуры Германіі.
Акрамя таго, пад ператрусы патрапілі жыллё і працоўнае месца «яшчэ адной асобы», а таксама два офісы разведслужбы ў Берліне і Пулаху.
Федэральная разведвальная служба не раскрывае падрабязнасцяў абвінавачання, адзначыўшы, што «стрыманасць і прыватнасць вельмі важныя ў гэтым асаблівым выпадку».
«У выпадку з Расіяй мы маем справу з актарам, які адрозніваецца беспрынцыповасцю і гатоўнасцю да гвалту. Кожная раскрытая дэталь дасць суперніку перавагу ў намеры нанесці шкоду Германіі», — сказаў кіраўнік Федэральнай разведвальнай службы Бруна Каль.
Паводле яго слоў, поспех расследавання шмат у чым залежыць ад таго, каб як мага менш інфармацыі стала здабыткам грамадскасці, пакуль пракуратура не завершыць следчыя мерапрыемствы.
У загінулай у Сляпянцы дзяўчыне апазналі Яну Кастранкову2
Каментары