Сугак, Ментусава, Данэйка, Мэрыем і іншыя паспяховыя беларускі падзяліліся галоўнымі жыццёвымі абломамі

Марына Ментусава адзначыла, што прыдумала арганізаваць такі івэнт са сваёй сяброўкай Верай, каб дапамагаць жанчынам павышаць талерантнасць да памылак, бо ў нашым грамадстве ў прынцыпе не прынята лёгка ставіцца да пралікаў, а ўжо калі гаворка ідзе пра жанчын — тым больш.

«Калі мы хочам нечага дасягнуць, трэба ўспрымаць памылкі як частку шляху, а не катастрофу. Крыштальна белае рэпутацыйнае паліто не гарантуе шчасця і поспеху», — падкрэсліла Марына Ментусава.

Сама яна адразу выклала публіцы ўсе козыры пра сябе.

«Я лажаю ўвесь час, і гэта не какецтва. Я той чалавек, які не памяняў пашпарт за тыдзень да таго, як яго трэба было мяняць, і за тыдзень да таго закона, калі яго ўжо нельга было потым мяняць. Парваныя сукенкі за хвіліну да выступаў, тры разводы на тры шлюбы, чатыры эміграцыі, паміж 3-4 крымінальнымі справамі. Часам мне падаецца, што ў мяне будзе не біяграфія, а летапіс лажы, у якую я ўмудрылася ўступіць».

Як у чалавека, які даўно працуе ў сферы івэнтаў, у Кацярыны Раецкай назапасіўся цэлы стос гісторый-факапаў. Многія з іх навучылі яе, што ў працы пажадана абапірацца на правераных людзей, якія разумеюць твае каштоўнасці, і нават калі ты давяраеш падрадчыкам, лепш перадбаць і ўсё пераправерыць.

«Музычны рынг», Чыжоўка арэна, суперфінал. Мы запрашаем туды вялікую артыстку. І потым з апаратнай я бачу, як побач з ёй пачынае капаць пластык з сафіта, на яе крэсла і побач. За секунду, здаецца, я аббегла плошчу вялікай арэны, каб націснуць кнопку, каб людзей пачалі эвакуяваць. У працэсе высветлілася, што нашы падрадчыкі не прамачылі фіранкі спецыяльнай супрацьпажарнай прапіткай. Усё нагрэлася, а там закрытая пляцоўка, дзе было 200 чалавек, шмат правадоў, тэхнікі…».

Яшчэ адна гісторыя ад Каці была пра эпізод з кар’еры, які моцна напужаў яе і вывеў з сябе, здаецца, мацней за затрыманне яе мужа Дзяніса Дудзінскага.

«Ішоў 2015 год, я прадзюсавала міжнароднае шоу «Бітва хароў». Прыехала шмат замежнікаў. Мы правялі класнае шоу, увесь Палац спорту тры дні гудзеў — усе адпрацавалі сапраўды бліскуча. І вось мы ішлі на цырымонію ўзнагароджвання пераможцаў. І там павінен быў спрацаваць пнеўмафеерверк — такі залаты дождж, блішчынкі, якія разлятаюцца. Вядучы анансаваў, што перамог французскі хор. Уся сцэна была абнесеная агароджамі.

Але падчас запланаваных стрэлаў феерверка адзін француз падхапіўся, пераскочыў праз агароджу і апынуўся ў зоне, дзе якраз працуе пнеўмафеерверк — і вось яму ў твар страляюць усе бліскаўкі».

Кацярына распавяла, што француз тады траўмаваў вока, і гэта гісторыя паказала ёй, што нават калі ты ўсё прадумаў, то сітуацыя можа пайсці наўскасяк. «Абарона ад дурня патрэбная паўсюль», — падсумавала Каця.

Кацярына Данэйка з CleanWhale, здаецца, магла б расказваць байкі пра клінінг да ночы.

За гады працы яна з партнёрамі разрульвала і тое, што супрацоўніца замест таго, каб прыбірацца, з’ела ў кліента тунец і напілася яго ж алкаголем, у выніку заснуўшы ў кватэры. Яшчэ адна работніца паклікала на кватэру свайго бойфрэнда. «Магчыма, іх відэа можна знайсці на Порнхабе», — пракаментавала Кацярына. Сябры іншых супрацоўнікаў неяк прыйшлі на кватэру і з’елі цукеркі сына кліенткі, потым апраўдваючыся тым, што ў іх упаў узровень цукру ў крыві.

Але галоўным факапам на гэтым этапе дырэктарка клінінгу назвала тое, як часам інфантыльна паводзіла сябе ў бізнэсе, які яны з партнёрамі маштабуюць з 2016 года. «Першы раз мне трэба было звольніць чалавека ў 22 гады, а ў яе ж сын у турме, фінансавыя складанасці… Гэта далося мне балюча, я прыйшла дадому і прараўла ўвесь вечар. Думала, можа, даць жанчыне чарговы шанец».

Першыя сур’ёзныя складанасці настолькі выбілі Кацярыну з каляіны, што яна злілася са сваіх працоўных абавязкаў, перастала адказваць калегам у чатах. Пазней такое ж паўтарылася, калі іх клінінгу трэба было выходзіць на нямецкі рынак, які падаваўся ёй непад’ёмным.

«Я скідвала шмат у жыцці на ПМС, дэпрэсію ці СДУГ замест таго, каб прыняць свае страхі і навучыцца браць адказнасць», — шчыра прызналася дзяўчына.

Наталі Падаляк таксама падзялілася хутчэй нават не факапам, а гісторыяй прыняцця ўласнага шляху і ўнутранай трансфармацыі. Разам з мужам яны ў свой час стварылі паспяховую анлайн-школу кандытарскага майстэрства Lililoveme. Але Наталі так асабіста перажывала падзеі ў Беларусі ў 2020-м, а потым і вайну ва Украіне, што праца адышла на другі план. Наклаўся і дэкрэт. Пазней яна асэнсавала, што гэта ўжо не той праект, якім яна хоча займацца, хоць ён і быў паспяховы.

«Было, канечне, вельмі цяжка. Трэба было зразумець, чым я зноў хачу займацца ўвогуле, «кім хачу стаць, як вырасту». Самае галоўнае, што я ў выніку асэнсавала, што мая каштоўнасць не ў бізнэсе, я каштоўная сама па сабе. Калі вы некалі таксама будзеце ў стане — «мне трэба» і «я больш так не магу», ведайце, што гэта не правал, а кропка росту, момант, дзе вы можаце перасабраць сябе наноў», — дала параду Наталі, ставячы ў прыклад сябе і мужа, які цяпер знайшоў сябе ў дызайне кніжак. Наталі ж дапамагае ахвотным са стратэгіяй развіцця блогаў.

Самай вясёлай, здаецца, гісторыяй падзялілася журналістка Яўгенія Сугак. Спачатку яна думала згадваць нешта са сваёй разнастайнай журналісцкай кар’еры пад загалоўкам «мой галоўны факап — тое, што я ў прынцыпе стала журналісткай, і цяпер спрабую не памерці пад мостам». Але на справе распавяла гісторыю з часоў падпрацоўкі ў казіно.

«На світанку студэнцтва я пайшла туды часова падпрацаваць. І калі ў першы месяц мне далі разава чаявыя 500 даляраў, я там вырашыла затрымацца. Я мусіла вывучыць усе правілы: покер, рулетка, блэкджэк… Але я ж была студэнткай, таму вырашыла не вучыць, маўляў, і так гульцы ведаюць правілы. І вось аднойчы завітаў чалавек, які не ведаў правілы покера. Ён падышоў да мяне спытаць — а я таксама не ведаю. А вакол камеры! У выніку я прыдумала кавалачак правілаў! І гэты чувак нават па іх выйграў! Дагэтуль не ведаю, ці па маіх усё ж правілах, ці па сваіх, але ён даў мне на чай».

Былая палітзняволеная Мэрыем Герасіменка, відавочна, не магла абмінуць увагай той фатальны дзень са жніўня 2022-га, калі яна праспявала ў Мінску на аўтарскім вулічным канцэрце песню «Обійми» гурта «Океан Эльзи». Пасля гэтага яе жыццё перакулілася. «Маю школу закрылі, у сяброў адціснулі бар, маладога чалавека дэпартавалі з Беларусі на 10 год, я правяла ў турме 6,5 месяца…».

Спявачка шчыра прызналася, што на гэты момант спець «Обійми» у Мінску ўзору 2022-га па суме ўсіх наступстваў — для яе гэта галоўны факап.

«Нас вы**алі так, што не перадаць словамі. Але я не здрадзіла сабе. Я заўсёды за мір, свабоду, Украіну, беларусаў і расіян (мой муж — расіянін)», — сарвала апладысменты Мэрыем.

Павялічыць

• 8
• 4
• 4
• 9
• 0
• 1
• 0
• 1