Душ зранку можа падбадзёрыць і дапамагчы развалюхацца, але, як высвятляецца, у вячэрняга душа значна больш пераваг — у тым ліку для здароўя скуры і якасці сну.
Многія прывыклі пачынаць дзень з душа, каб прачнуцца і адчуць сябе бадзёра. Але дактары сцвярджаюць: гэта не самая карысная звычка.
Паводле дэрматолагаў, на якіх спасылаецца Daily Mail, на працягу дня скура і валасы збіраюць на сабе мноства шкодных рэчываў — пыл, мікрачасціцы выхлапных газаў, пот, рэшткі касметыкі. Асабліва шмат гэтага назапашваецца летам, калі ў паветры больш пылку і людзі больш пацеюць. Калі легчы ў ложак без душу, усё гэта пераносіцца на пасцелю. У выніку — сверб, начная алергія і праблемы са скурай, напрыклад прышчы, з-за брудных прасцін і наўлечак.
Акрамя гэтага, душ перад сном дапамагае лепш заснуць. Паводле спецыялістаў, цёплы душ стымулюе выпрацоўку мелатаніну — гармону, які паведамляе арганізму, што прыйшоў час адпачынку. Акрамя таго, у час перад сном цела натуральным чынам пачынае ахаладжацца, што спрыяе засынанню. Прыём цёплага душу і наступнае выціранне ручніком імітуюць гэты працэс: цела паступова астывае да аптымальнай тэмпературы для сну.
Гэтая з’ява пацверджана навукай: метааналіз 17 даследаванняў, праведзены ў 2019 годзе, вынік якога апублікаваны ў часопісе Sleep Medicine Reviews, паказаў, што вячэрні душ пры тэмпературы ад 40°C да 42,5°C істотна паляпшае якасць сну.
Вячэрні душ можа быць асабліва карысны тым, у каго сухая або адчувальная скура, акне альбо экзэма. Такія станоўчыя эфекты звязаныя з тым, што скура актыўна аднаўляецца ноччу. І калі перад сном змыць бруд і нанясці ўвільгатняльнік, вільгаць затрымаецца на даўжэй, што дапаможа аднавіць абарончую функцыю скуры.
Спецыялісты не адмаўляюць, што ранішні душ таксама мае сэнс. Ён можа дапамагчы прачнуцца, змыць начны пот і падрыхтавацца да дня. Але калі гаворка ідзе пра агульны ўплыў на здароўе скуры і якасці сну — вячэрні душ мае відавочную перавагу.
Дарэчы, апытанні паказваюць, што людзі дзеляцца прыкладна напалову: частка аддае перавагу ранішняму душу, частка — вячэрняму. Пры гэтым некаторыя мыюцца толькі раз на некалькі дзён, а то і раз на тыдзень.
Калі ж вы хочаце чысціню, здаровую скуру і якасны сон — вячэрні душ можа стаць самай простай звычкай, якая прынясе максімум карысці.
Цяпер чытаюць
У СІЗА КДБ адшукаўся падпалкоўнік Зара, якога сілавікі лічаць аналітыкам Сахашчыка. Як ён апынуўся ў Беларусі — невядома14
Каментары