Колькі часу займае выдача пашпарта новай Беларусі? Былы каліновец расказаў, як атрымліваў дакумент

Клачко тлумачыць, што для яго ў гісторыі з пашпартам новай Беларусі галоўнае — ідэйны складнік:

«У гэтым праекце я бачу беларускую нацыянальную ідэю. Таксама ўсё, што дрэнна для рэжыму Лукашэнкі, добра для беларусаў, а паспяховая рэалізацыя гэтага праекта максімальна аслабляе рэжым. Падмена рэжымных інстытутаў, дакументаў, якія можа выдаваць рэжым, прыводзіць да яго слабасці».

На думку Аляксандра, ідэя пашпарта — адна з тых канцэпцый, якія могуць аб’яднаць і натхніць беларусаў. Для гэтага трэба, каб выдаваліся новыя пашпарты, працэс працягваўся, і з’яўляліся краіны, якія будуць гэты пашпарт прызнаваць. Такі поспех, кажа Клачко, быў бы вельмі важны цяпер, калі беларусы часта страчваюць надзею на лепшае. І ў дэмакратычнай Беларусі, лічыць Аляксандр, гэты пашпарт дакладна стане дзейным.

«Калі ўсё атрымаецца, то ў пашпарта будзе і практычная функцыя. Гэта будзе неабходны дакумент для нас, беларусаў замежжа, хто не атрымаў уцякацтва, каб можна было як мінімум перасякаць межы».

Працэс атрымання просты, расказвае Клачко. Для пачатку трэба зайсці на сайт belarus-passport.com і націснуць на кнопку з надпісам Apply for pre-registration. Далей сістэма папросіць аплаціць 7 еўра за верыфікацыю.

Каб верыфікаваць сябе, спатрэбіцца фатаграфія афіцыйнага беларускага пашпарта, пратэрмінаваны таксама падыдзе. Да яе трэба будзе дадаць фота дазволу на жыхарства ў краіне пражывання і сфатаграфавацца самому.

Пасля верыфікацыі чалавеку паведамяць, ці яна пройдзеная паспяхова. Калі ўсё добра, трэба будзе заплаціць 90 еўра за выраб пашпарта і зарэгістравацца на здачу біяметрычных даных — паводле слоў Аляксандра, гэта магчыма зрабіць у Вільні, Кіеве і Варшаве.

Сам Клачко здаваў адбіткі пальцаў у Беларускім пашпартным цэнтры ў Вільні. Расказвае, што чаргі на здачу не было — заўважыў толькі яшчэ аднаго чалавека. Далей трэба пачакаць некалькі працоўных дзён, і пашпарт будзе гатовы. У выпадку Аляксандра ад рэгістрацыі на сайце да атрымання пашпарта прайшоў тыдзень.

Аляксандр кажа, што ў гатовым пашпарце «ўзровень беларускасці зашкальвае», і для Клачко гэта важна. Калі параўнаць гэты пашпарт з афіцыйным беларускім пашпартам, у дзяржаўнай версіі дакумента няма столькіх нацыянальных элементаў, як у пашпарце новай Беларусі. Напрыклад, на вокладцы новага пашпарта ёсць Пагоня і элемент слуцкага пояса, а ўнутры — гімн БНР і беларуская лацінка. На старонках пашпарта — выявы беларускіх мясцін.

Клачко знаходзіць для сябе ў гэтым пашпарце яшчэ адзін сэнс. Для яго, калі ён ехаў ваяваць ва Украіну, шмат у чым было важна далучыцца да гістарычнай падзеі — такая ж логіка працуе і тут:

«Пашпартны праект — гэта не толькі ідэя і практычнае прымяненне, бо патэнцыйна гэта трэвел-дакумент і паўнавартасны беларускі пашпарт. Для мяне гэта таксама вельмі важная гістарычная падзея, якая ўжо адбылася і ўвойдзе ў гісторыю незалежнай Беларусі, як у свой час увайшоў пашпарт БНР. Усведамляю, што не ўсе мяне зразумеюць, але для мяне гэта важна — быць датычным да гістарычных працэсаў, якія ўплываюць на лёс Беларусі.

Чым бы гэты праект ні скончыўся, ён ужо фактычна рэалізаваны ў фізічным выглядзе, то-бок дакумент адпавядае ўсім патрабаванням да стандартнага пашпарта любой краіны свету».

• 48
• 3
• 5
• 9
• 0
• 0
• 0
• 2