Салігорскі «Шахцёр» быў беларускім топ-клубам, але яго загубілі дамоўныя матчы і сумнеўныя асобы.
Футбольны салігорскі «Шахцёр» падаў на банкруцтва. Працэдуру запусцілі 11 чэрвеня.
«Шахцёр» быў адным з асноўных топ-клубаў беларускага футбола. Ён тройчы выйграваў чэмпіянат краіны (2005, 2020, 2021), столькі ж разоў перамагаў у Кубку Беларусі (2004, 2014, 2019), двойчы браў Суперкубак (2021, 2023). Гарнякі шэсць разоў станавіліся сярэбранымі прызёрамі чэмпіянату і восем разоў бронзавымі.
Але ў мінулым сезоне «Шахцёр» упершыню ў гісторыі вылецеў з вышэйшай лігі. Яго загубіла гучная справа аб дамоўных матчах.
У 2022 годзе салігорцы выйгралі чацвёрты чэмпіёнскі тытул. Аднак пазней высветлілася, што кіраўніцтва клуба фінансава стымулявала іншыя каманды перад матчамі з прамымі канкурэнтамі «Шахцёра», а таксама прапаноўвала арганізаваць некалькі дамоўных матчаў.
У выніку «Шахцёр» быў пазбаўлены чэмпіёнства і аштрафаваны. Таксама клуб пазбавілі 30 балаў на старце сезона-2023 і 20 балаў у сезоне-2024. Каманду пакінулі большасць вядучых гульцоў. Мінулы чэмпіянат гарнякі скончылі на апошнім месцы з двума баламі (гэта з улікам штрафу ў -20).
Паралельна сілавікі расследавалі махлярскую схему, якую арганізаваў у клубе расійскі агент Яўген Култаеў-старэйшы. У выніку экс-дырэктар «Шахцёра» Аляксандр Марчанка атрымалі шэсць гадоў калоніі, а галоўны арганізатар на лаву падсудных не трапіў.
Заяўляцца ў першую лігу-2025 «Шахцёр» не стаў. Клуб вырашылі расфарміраваць, ён нават стаў распрадаваць спартыўную форму. Футбол у Салігорску чакае перазагрузка.
Цяпер чытаюць
Пратэжэ лукашэнкаўскага фаварыта Баскава будуе акадэмію ў Бразіліі і Нью-Васюкі сусветнага маштабу10
Каментары