Чэшская разведка расказала, як прадухіліла замах Кітая на віцэ-прэзідэнтку Тайваня
Агенты кітайскай амбасады планавалі зладзіць наезд на картэж, у якім віцэ-прэзідэнтка Тайваня перасоўвалася падчас візіту ў Прагу.
Чэшская разведка на гэтым тыдні заявіла, што прадухіліла замах на былую віцэ-прэзідэнтку Тайваня Сяа Бі-хім падчас яе візіту ў Чэхію ў сакавіку 2024 года.
Пра гэта піша «Еўрапейская праўда» са спасылкай на агенцтва AFP.
Прадстаўнік чэшскай вайсковай разведкі Ян Пэйсэк заявіў AFP у нядзелю, што Сяа Бі-хім была мішэнню «асоб, легалізаваных на дыпламатычных пасадах у кітайскай амбасадзе ў Празе».
Ён сказаў, што яны сачылі за ёй і збіралі інфармацыю аб праграме Сяа Бі-хім і яе сустрэчах з чэшскімі чыноўнікамі.
«Мы нават зафіксавалі спробы кітайскай цывільнай разведкі стварыць умовы для дэманстратыўных дзеянняў супраць чалавека, які знаходзіцца пад абаронай, якія, аднак, не выйшлі за рамкі падрыхтоўчага этапу», — дадаў Пэйсэк.
Паводле паведамлення вайсковай разведкі Чэхіі, агенты кітайскай амбасады планавалі зладзіць наезд на картэж, у якім віцэ-прэзідэнтка Тайваня перасоўвалася падчас візіту ў Прагу.
Сама Сяа Бі-хім, рэагуючы на інфармацыю аб замаху на яе, заявіла, што «незаконныя дзеянні» Камуністычнай партыі Кітая яе не запалохаюць і яна «будзе працягваць адстойваць інтарэсы Тайваня ў міжнароднай супольнасці».
Чэхія, як і большасць краін, не мае афіцыйных дыпламатычных адносін з Тайванем, але падтрымлівае трывалыя нефармальныя кантакты. Тайваньскія высокатэхналагічныя кампаніі таксама з'яўляюцца значнымі інвестарамі ў Чэхіі.
У 2023 годзе ўрады Чэхіі і Тайваня дамовіліся аб супрацоўніцтве ў аднаўленні Украіны.
Інжынера-канструктара з упраўлення «Пеленга», якое робіць тэхніку для расійскага войска, асудзілі па палітычных артыкулах3
Каментары