Па дарозе са Швецыі ў Беларусь машына згубіла мінімум 300 тысяч кіламетраў прабегу — цяпер яе прадаюць за $15 тысяч
Аўтамабілі са скарэктаваным прабегам у Беларусі — не рэдкасць. Але ў некаторых выпадках розніца паміж рэальнымі лічбамі і паказчыкамі на адометры можа ўразіць нават бывалых аўтамабілістаў.
За 14 999 даляраў у Гродне прадаецца Seat Leon 2019 года выпуску. Пад капотам у яго 1,5-літровы рухавік, які ад завода працуе не толькі на бензіне, але і на метане. Заяўлены прабег аўтамабіля — 160 400 кіламетраў. Але ёсць нюанс.
Да таго, як трапіць у Беларусь, гэта машына ездзіла ў Швецыі, а дакладней — працавала ў якасці таксі. Таму рэальны прабег у яе значна большы за той, што пазначаны ў аб'яве.
Каб атрымаць інфармацыю пра сапраўдны прабег, дастаткова ведаць VIN-нумар аўтамабіля і спецыяльныя шведскія сайты, на якіх бясплатна можна паглядзець даныя.
Зразумець, што VIN-нумар указаны без памылак і што аўтамабіль у аб’яве і ў шведскіх базах адзін і той жа, дапамагае фота, на якім бачная таблічка з нумарам кузава і іншай інфармацыяй.
Праверка па нумары кузава на сайце biluppgifter.se паказвае, што апошні зафіксаваны прабег аўтамабіля ў Швецыі — 45 562 шведскія мілі (1 шведская міля = 10 км). Таксама сайт паказвае, з якім нумарам ездзіў гэты аўтамабіль — CCA04A.
Іншы сайт, дзе таксама захоўваецца інфармацыя пра аўто, падае даныя пра прабег ужо ў звыклых для нас кіламетрах, а не ў шведскіх мілях. Гэты рэсурс пацвярджае тую ж самую інфармацыю.
Падчас апошняй інспекцыі ў Швецыі, якая адбывалася ў самым пачатку 2024 года, прабег гэтага SEAT складаў 455 620 кіламетраў, а апошні зафіксаваны прабег падчас продажу праз аўкцыён — 459 010 кіламетраў. Гэта на 300 тысяч больш за прабег, з якім машыну прадаюць у Беларусі.
Адметна, што пасля продажу на аўкцыёне ў сакавіку 2024 года машына яшчэ некалькі месяцаў заставалася ў Швецыі — пакуль 18 ліпеня 2024 года не была аформлена на экспарт.
Але выглядае, са Швецыі SEAT не адразу адправіўся ў Беларусь, паколькі размытнілі яго ў нас толькі праз тры месяцы пасля зняцця з уліку ў Швецыі — 31 кастрычніка 2024 года.
Колькі яшчэ за паўтара года праехаў гэты Seat Leon — гісторыя замоўчвае. Як і да канца незразумела, на якім этапе ён згубіў не менш за 300 тысяч кіламетраў прабегу. Але факт застаецца фактам: яшчэ паўтара года таму машына прадавалася ў Швецыі з прабегам 459 тысяч кіламетраў, а цяпер у Беларусі — з 160 тысяч.
Цяпер чытаюць
На мітынгу ў Вільні паліцыя затрымала правакатара. А Ціханоўскі заявіў пра намер дабівацца сустрэчы з Зяленскім1
Каментары