У Брэсце на гарадской набярэжнай мясцовая блогерка натрапіла на вялікую змяю і зняла яе на відэа. Ролік з’явіўся ў TikTok з подпісам: «Вуж ці гадзюка?» — і выклікаў бурнае абмеркаванне сярод карыстальнікаў, піша Onliner.by.
Паводле слоў аўтаркі, змяя прыпаўзла менавіта ў тое месца, дзе дзяўчына незадоўга да гэтага сядзела і фатаграфавалася. Паўзун перад камерай паводзіўся даволі бадзёра: то падпаўзаў бліжэй да людзей, то залазіў пад памост каля вады і з цікаўнасцю выглядаў адтуль. За тры дні відэа набрала 1,7 мільёна праглядаў і больш за чатыры тысячы каментароў.
Большасць каментатараў сышліся ў меркаванні, што на відэа — неядавіты вуж. Аднак знайшліся і тыя, хто сцвярджаў, што гэта магла быць гадзюка. Карыстальнікаў асабліва ўразілі ўнушальныя памеры змяі.
«Звычайны вуж, прыгожы, блішчыць на сонцы. Іх лёгка пазнаць — на галаве жоўтыя плямы», — напісала адна з каментатараў.
«Для мяне гэта анаконда», — пажартавала іншая.
«Мяне адну здзіўляе спакой аўтаркі і навакольных? Я б крычала і бегла прэч — усё роўна, вуж гэта ці гадзюка», — прызналася яшчэ адна карыстальніца.
Знайшліся і тыя, хто выказаў здагадку, што брэсцкая змяя — гэта нейкі свежы гібрыд вужа і гадзюкі.
Каментары