У Беларусі будзе працаваць спрошчаны парадак прымусовага спагнання штрафаў. Цяпер некаторыя выплаты, напрыклад, за парушэнні ПДР, будуць аўтаматычна спісвацца з банкаўскага рахунку без лішніх папер, піша sb.by.
Чытач выдання заўважыў, што з яго карткі раптам зніклі грошы. Высветлілася, што гэта быў нявыплачаны штраф, накладзены ДАІ, які ў аўтаматычным парадку спаганялі органы прымусовага выканання праз сістэму АІС ВГА — аўтаматызаваную інфармацыйную сістэму выканання грашовых абавязацельстваў.
Як растлумачылі ў Галоўным упраўленні прымусовага выканання Мінюста, новаўвядзенні прадугледжваюць спрошчаны парадак выканання для штрафаў да 20 базавых велічынь (цяпер гэта 840 рублёў) і калі ў даўжніка няма іншых падобных выканаўчых спраў.
У выпадку неаплаты штрафа ў тэрмін будзе дадаткова спаганяцца прымусовы збор — не менш за 0,5 базавай велічыні (21 рубель).
Судовы выканаўца, атрымаўшы дакумент на спагнанне, адразу распачынае справу — без дадатковага тэрміну для добраахвотнай аплаты, бо ён ужо быў дадзены падчас адміністрацыйнага працэсу.
Грошы спісваюцца аўтаматычна праз АІС ВГА. Пасля поўнай аплаты выканаўчая справа закрываецца.
Калі ж чалавек аплаціў штраф раней, але грошы ўсё адно спісалі, ён можа падаць хадайніцтва судоваму выканаўцу і вярнуць няправільна ўтрыманую суму — дастаткова прыкласці адпаведную квітанцыю.
Міністр юстыцыі Яўген Каваленка яшчэ ў лютым казаў, што новы закон накіраваны на павышэнне эфектыўнасці выканання дакументаў, спрашчэнне працэдур, лічбавізацыю і абарону інтарэсаў тых, хто мае права на спагнанне.
Каментары
Рахунак, з якога ў любы момант можа ўзяць грошы нейкая АІС - тое ж самае, што кватэра, ключы ад якой ёсць і ў ЖЭС, які можа зайсці ў любы момант і нешта вынесці на свой выбар.
Зусім іншы падыход да маёмасці. Нават з улікам таго, што штрафы інструмент для "справядлівасці".
"Новы закон накіраваны на ... абарону інтарэсаў тых, хто мае права на спагнанне".
Гэта пра тое, што ў выпадку памылкі АІС можаш напісаць хадайніцтва. Твае інтарэсы абараняюцца, але ў апошнюю чаргу.
пасля чаго, калі на балансе было X рублёў, іх там стане X-Y.
І калі Y>X, будзе мінус. Усё, што будзе паступаць на рахунак, будзе ісці ў першую чаргу на пагашэнне гэтага мінуса.
Ці ёсць у вас грошы на паесці, ці зручней было б пагашаць часткамі, нікога не цікавіць.
Адпаведна, змагарскі выбар, жывучы ў рэжыме - альбо наяўныя, альбо замежны банк.