«Трэба разварочваць аўтобусы». Перавозчыкі дамовіліся змагацца з людзьмі, якія перасаджваюцца на мяжы
Беларусы актыўна выкарыстоўваюць лайфхак, як праходзіць мяжу хутчэй. Але транспартнай інспекцыі і перавозчыкам гэта вельмі не падабаецца.
Перавозчыкі і транспартная інспекцыя хочуць актыўней змагацца з папулярным лайфхаком па хуткім праходжанні мяжы. Гэтае пытанне яны абмеркавалі на сустрэчы ў Гродне.
Шматлікія пасажыры ў чэргах перасаджваюцца ў аўтобусы, якія стаяць бліжэй да шлагбаўма. Паслуга гэтая платная, як лічаць перавозчыкі, часта кіроўцы забіраюць грошы сабе «мiма касы».
Прадстаўнікі транспартнай інспекцыі кажуць, што гэта парушэнне правіл. Чарга на мяжы — гэта не аўтавакзал, і пасадка пасажыраў там забароненая, пiша Мiжрэгіянальная асацыяцыя перавозчыкаў.
Перавозчыкаў падсадкі таксама не задавальняюць. Перш за ўсё, пасажыры не спяшаюцца купляць білеты, напрыклад, з Гродна да Варшавы, а спрабуюць знайсці спадарожны транспарт ужо ў пункце пропуску. А гэта страта выручкі, і нават страты ад паездак з пустымі салонамі. Па-другое, перавозчыкі лічаць, што падсадкі таксама ўскосна ўплываюць на ўзнікненне чэргаў.
«У чаргу загоняць пусты аўтобус, які пад выглядам турыстычнага курсіруе толькі ад Брэста, напрыклад, да Тэрэспаля. І ён проста «збірае» пасажыраў ужо каля самага шлагбаўма. І можа не кранацца, пакуль не збярэ поўны салон, а астатнія вымушаныя чакаць», — скардзяцца перавозчыкі на канкурэнтаў.
Перавозчыкі знайшлі, як ім здаецца, лёгкае і таннае рашэнне праблемы. Яны прапанавалі інспекцыі правяраць, каб колькасць пасажыраў у салоне па дакументах адпавядала той колькасці людзей, што селі ў транспарт на аўтавакзале. У выпадку перавышэння — разварочваць аўтобус. Тут яны спасылаюцца на правілы: пасадка пасажыраў у міжнародны аўтобус дапускаецца толькі на аўтавакзалах або аўтастанцыях.
«Падсадкі» — дастаткова папулярная практыка на мяжы, калі чарга расцягваецца на дзесяткі аўтобусаў. А здараецца такое часта. Некаторыя перавозчыкі могуць дазваляць перасаджвацца бясплатна, але толькі ў свае ж аўтобусы, якія стаяць бліжэй да шлагбаўма. У іншых выпадках давядзецца плаціць. Такса бывае розная, у сярэднім — 40 еўра. Некаторыя могуць браць 100-150 рублёў. Аднак падчас рэйдаў транспартнай інспекцыі кіроўцы браць новых пасажыраў адмаўляюцца.
Цяпер чытаюць
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам30
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2424
Каментары