«Змеі паслядоўна ўціраюцца ў давер». Азаронак не пакінуў каменя на камні ад знакавых прарасійскіх актывістаў

Азаронак пачынае падыходзіць да асноўнай тэмы здалёк — зваротам да гісторыі рэвалюцыі 1917 года. Паводле яго, асноўную ваду тады замуцілі не нейкія рэвалюцыянеры, якія ўсе былі ў падполлі і за мяжой, а свае ж людзі, нібыта блізкія да царскага рэжыму. Спачатку яны забілі Грыгорыя Распуціна, а пасля зладзілі і Лютаўскую рэвалюцыю.

«Тыя, хто на словах быў і за краіну, і за перамогу — менавіта яны кінулі Айчыну ў вар'яцкую смуту лютага, з якой потым даставалі ўжо праз год бальшавікі», — піша Азаронак.

А пасля рэзка звяртаецца ўжо да сучаснасці, згадваючы пра тое, як у нядаўнім інтэрв'ю журналісту амерыканскага выдання Time Лукашэнка расказаў пра нейкія таемныя сілы ўнутры «Саюзнай дзяржавы», якія, паводле ацэнкі Азаронка,

«сістэматычна робяць усё для развалу і разбурэння гэтага самага Саюза. І робяць яны гэта не пад заходнімі або ліберальнымі лозунгамі, а пад нібыта прарасійскімі».

Але калі Лукашэнка ніякіх прозвішчаў не называў, то Азаронак гаворыць пра «гэтых здраднікаў і ворагаў з правага флангу» напрамую.

Першай пад ягоны агонь трапляе віцебская прарасійская актывістка Эльвіра Мірсалімава, генэзіс якой, як сцвярджае Азаронак — у «пратэстанцкай антысавецкай масонскай секце YMCA», пад гімн якой нібыта танчыць і цяперашні прэзідэнт ЗША Дональд Трамп. Азаронак папракае Мірсалімаву тым, што яе сястра і маці стаяць на пазіцыях, адваротных ад ейных, і цяпер знаходзяцца ў Польшчы, а сама яна, маўляў, «атрымала задачу сядзець тут і паслядоўна ўносіць раскол у саюз Беларусі і Расіі».

«Гэтыя змеі паслядоўна […] уціраюцца на прарасійскіх лозунгах у давер да пасольства, Рассупрацоўніцтва, фонду Гарчакова і іншых «інстытутаў». Там яны паслядоўна, з зайздросным пастаянствам, як у сектах вучылі — паўтараюць адно і тое ж: «Тут улада празаходняя, шматвектарная, усе паслядоўнікі ўлады — русафобы і нацыяналісты. Сама Беларусь — нахлебніца, а народ толькі і марыць, як бы ліквідаваць нашу суверэнную дзяржаву», — кляйміць Мірсалімаву Азаронак.

Не шкадуе ён і іншых вядомых у Беларусі прарасійскіх актывістаў.

Міхаіл Юспа для яго — «заўзяты фанат Ізраіля, ЦАХАЛа і Масада, ну і заадно — «прарасійскі» актывіст. Таксама строчыць паперкі, таксама паскудзіць, таксама ненавідзіць нашага прэзідэнта». Ва Усевалада Шымава «амбіцый на вагон, а талентаў — на тачку з гноем», плюс брат на «Радыё Свабода». Сяргей Шыптэнка «хаваецца за ананімнымі каналамі, але беспаспяхова. П'е кожны вечар беларускі бальзам і вырыгае нянавісць на краіну». Юрый Баранчык, Аляксандр Гронскі, Кірыл Авяр'янаў і Арцём Агафонаў — «уцекачы, ненавіснікі, паслядоўнікі чорнай справы Паўла Шарамета, які выконваў заказ празаходняга алігархату».

«Менавіта яны зладзілі скандал і істэрыку з нагоды фэйкавай «забароны георгіеўскіх стужак» у Беларусі. Менавіта яны выкарыстоўваюць вялікую акцыю «Бессмяротны полк» для брудных палітычных маніпуляцый. Менавіта яны абражаюцца на кожную шыльду на беларускай мове. Менавіта яны сістэмна і беспакарана (пакуль) абражаюць нашых дзяржслужбоўцаў. У чатах іх каналаў дзеецца сапраўдная вакханалія мярзоты і подласці, здрады і нянавісці», — проста крычыць прапагандыст.

І як доказ таго, што ўсе гэтыя людзі насамрэч працуюць на Захад, прыводзіць аргумент, што ніхто з іх не трапіў пад заходнія санкцыі, «у адрозненне ад тых жа «ябацек», што даўно ва ўсіх магчымых люстрацыйных спісах».

«Мы бачым гэтую здраду. Мы ведаем імёны. Мы ведаем сумы і каналы сувязі. Мы выкаранім здраду — і злева, і справа. Бо так загадвае нам вялікі лёс Расіі і Беларусі», — падсумоўвае сваю філіпіку Рыгор Азаронак.

• 1
• 0
• 44
• 13
• 2
• 0
• 1
• 0