«У будні — 2‑7 чалавек». Ксяндза з Мінска адправілі служыць у Магілёў, і ён не хавае свайго расчаравання
Нядаўна мітрапаліт Мінска-Магілёўскі арцыбіскуп Юзаф Станеўскі абвясціў пра новыя прызначэнні ў сваёй дыяцэзіі. Ксёндз Аляксандр Улас, былы дырэктар галоўнага каталіцкага партала Беларусі, быў прызначаны на пасаду вікарыя парафіі Унебаўзяцця Найсвяцейшай Панны Марыі і Святога Станіслава ў Магілёве. І нават не рабіў выгляд з самага пачатку, што новае прызначэнне яго натхняе, заўважыў Katolik.life.
«Пасля 25 гадоў святарства здарылася зараз, што прызначыў мяне наш Мітрапаліт вікарыем у Магілёве. Замест каментароў дазвольце проста прамаўчаць. У некаторых сітуацыях цішыня прамаўляе лепш за словы», — з горыччу напісаў святар на сваёй старонцы ў фэйсбуку.
Многія вернікі выказалі падтрымку святару, адзначыўшы, што ён прамаўляў у мінскім катэдральным касцёле добрыя казанні, а не «разважанні, якія чытаюць з паперкі», і запэўнілі ў малітве за яго.
Адна з верніц зазначыла, што ўсюды ёсць людзі, годныя таго, каб пачуць добрыя казанні: «ці ў Магілёве, ці ў Мазыры, ці ў Малым Сітне». А жанчына непасрэдна з Магілёва сказала: «У Магiлёве таксама святары патрэбны. Не трэба нас баяцца».
Хочаш ці не хочаш, але не падпарадкавацца рашэнню біскупа святар не можа. Але ўжо пасля першага тыдня на новай пасадзе, служачы ў кафедральным касцёле ў Магілёве, ксёндз Аляксандр Улас на сваёй старонцы падзяліўся ўражаннямі ад новай працы. Яны выказаныя адным словам — «сумна», і гаворка не пра горад:
«Сум — пра іншае: пра храм і пра парафію. Кожны дзень — святая імша. Кожны дзень — споведзь. Раніцай на службу прыходзіць ад двух да шасці чалавек, увечары — ад трох да сямі».
Святар адзначыў, што ў чацвер на вячэрняй адарацыі ён налічыў усяго 13 людзей, якія маліліся, а за ўвесь тыдзень да споведзі прыступіла толькі пяць чалавек — і ўсе яны прыйшлі толькі ў нядзелю:
«Але, як сказаў адзін са святароў, «табе яшчэ пашанцавала» — у яго за цэлы месяц не было ніводнага, хто прыйшоў да споведзі».
У каментарах яму адзначылі, што «важная якасць, а не колькасць», і выказалі меркаванне, што «ёсць да чаго імкнуцца»:
«Ёсць над чым працаваць. Гарчычнае зерне, пасеянае ў зямлю, вырастае больш за іншыя дрэвы, так што і птушкі хаваюцца ў галінах. Вы творчы чалавек і класны святар. Вы зробіце ўсё, што будзе магчыма, для гэтых людзей і для ўсіх, хто яшчэ з'явіцца. Бог любіць пачынаць з малога».
Беларусы горача спрачаюцца, ці варта прывязваць дапамогу на дзіця да заробку маці51
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары