У Жодзіне будуюць новы стыльны медыцынскі цэнтр на месцы старога прафілакторыя. Рэканструкцыяй займаецца БелАЗ: медцэнтр прызначана для супрацоўнікаў прадпрыемства. Але ёсць шанец, што наведваць яго змогуць і мясцовыя жыхары, праўда ўжо платна, паведамляе Onlíner.
Яшчэ пару гадоў таму гэтая тэрыторыя належала кампаніі «Світанак». Калісьці тут размяшчаўся прафілакторый. Потым ён закрыўся, і будынак пуставаў. Проста па суседстве знаходзілася (ды і зараз знаходзіцца) спартыўная база футбольнага клуба «Тарпеда-БелАЗ». У нейкі момант на прадпрыемстве, якому належыць каманда, вырашылі выкупіць участак.
— Ужо даўно абмяркоўвалася пытанне аб медыцынскім страхаванні работнікаў. У выніку вырашылі зрабіць уласную паліклініку, — расказвае галоўны доктар медыка-санітарнай часткі Сяргей Будзько. — Сёння гэта ўнікальны выпадак, калі лячэбную ўстанову будуе прамысловая кампанія за ўласныя сродкі. Раней, у савецкі час, медсанчасці пры заводах былі распаўсюджанай практыкай, але ў 1990‑я многае змянілася. Каб выжыць, некаторыя прадпрыемствы адмаўляліся ад непрафільных актываў (базы адпачынку, палацы культуры, дзіцячыя садкі і медыцынскія ўстановы) і перадавалі іх на баланс бюджэтных арганізацый.
Стары будынак трэба было часткова разабраць і ўзмацніць, а таксама прыбудаваць да яго некалькі карпусоў. У цэнтры павінны размясціцца тэрапеўты і профільныя спецыялісты (ад гінеколагаў да эндакрынолагаў), стаматалагічныя кабінеты, абсталяванне для УГД і рэнтгена і нават МРТ-сканер.
— Цяпер падобнае абследаванне мясцовыя жыхары ездзяць рабіць у Барысаў ці Мінск. Першы апарат для МРТ з'явіцца ў гарадской бальніцы, другі — у нас. Плануем выкарыстоўваць яго кругласутачна.
Цэнтр будзе разлічана на 250—300 наведванняў за змену.
— Для работнікаў БЕЛАЗа прадугледжана бясплатнае абслугоўванне. Магчыма, яно будзе распаўсюджвацца і на іх сем'і, і на былых супрацоўнікаў. Разглядаем таксама варыянт, што паслугамі цэнтра на платнай аснове змогуць карыстацца і іншыя гараджане.
Работы на аб'екце пачаліся ў снежні мінулага года.
Маналітныя работы ўжо завершаны, кладка — таксама. На фасадах змантаваны ўсе металічныя канструкцыі. Зараз ідзе ўстаноўка вокнаў, паралельна выконваецца чарнавая сцяжка па паверхах. Будаўнікі рыхтуюцца да зімы, каб запусціць ацяпленне і наступныя тры месяцы займацца ўнутраным аздабленнем.
Інтэр'ер медцэнтра будзе вытрыманы ў светлай і спакойнай гаме: у афармленні будуць выкарыстаны белыя і шэрыя тоны, а ў кабінетах — мяккія акцэнты блакітнага і зялёнага. Сцены пакрыюць дэкаратыўнай тынкоўкай.
На першым паверсе размесціцца прасторны хол з рэгістратурай, зонай самазапісу, памяшканнем для афармлення бальнічных, буфетам і аптэкай. На іншых паверхах размесцяцца кабінеты дактароў, аддзяленні дыягностыкі, лабараторыі, стаматалогія.
Будзе таксама паўнавартаснае аддзяленне рэабілітацыі. Там будуць электра-, гразе– і вадалячэнне, фізіятэрапія. Для тых, каму прызначаць курс працэдур, прадугледжаны дзённы стацыянар на 20 ложкаў.
Будзе ва ўстанове і свой аўтамабіль на выпадак, калі спатрэбіцца тэрмінова наведаць пацыента дома ці, наадварот, прывезці на абследаванне. Пункт неадкладнай дапамогі тут таксама арганізуюць.
— На самім прадпрыемстве будуць працаваць пяць здраўпунктаў, і за кожным замацуюць свайго тэрапеўта. Урач будзе весці амбулаторны прыём у медцэнтры і рэгулярна выязджаць на свой здраўпункт — вывучаць умовы працы ў цэхах. Яму важна ведаць, якія фактары ўплываюць на здароўе супрацоўнікаў: шумы, вібрацыі, пыл, электрамагнітныя выпраменьванні, доўгатэрміновы стрэс.
У будынка будзе і адзін паверх пад зямлёй. Там запраектаваны не толькі тэхнічныя памяшканні, але і пакоі для персаналу: гардэробныя, душавыя.
— У медыка-санітарнай частцы будуць працаваць каля 110 чалавек. Плануем прыцягваць спецыялістаў у тым ліку з іншых гарадоў. Забяспечым іх жыллём: у прадпрыемства ёсць уласны інтэрнат. Акрамя таго, кампенсуем выдаткі на арэнду кватэры.
Здаць аб'ект у эксплуатацыю абяцаюць восенню 2026 года.
Каментары