U Žodzinie budujuć novy stylny miedycynski centr na miescy staroha prafiłaktoryja. Rekanstrukcyjaj zajmajecca BiełAZ: miedcentr pryznačana dla supracoŭnikaŭ pradpryjemstva. Ale jość šaniec, što naviedvać jaho zmohuć i miascovyja žychary, praŭda ŭžo płatna, paviedamlaje Onlíner.
Jašče paru hadoŭ tamu hetaja terytoryja naležała kampanii «Śvitanak». Kaliści tut raźmiaščaŭsia prafiłaktoryj. Potym jon zakryŭsia, i budynak pustavaŭ. Prosta pa susiedstvie znachodziłasia (dy i zaraz znachodzicca) spartyŭnaja baza futbolnaha kłuba «Tarpieda-BiełAZ». U niejki momant na pradpryjemstvie, jakomu naležyć kamanda, vyrašyli vykupić učastak.
— Užo daŭno abmiarkoŭvałasia pytańnie ab miedycynskim strachavańni rabotnikaŭ. U vyniku vyrašyli zrabić ułasnuju palikliniku, — raskazvaje hałoŭny doktar miedyka-sanitarnaj častki Siarhiej Budźko. — Siońnia heta ŭnikalny vypadak, kali lačebnuju ŭstanovu buduje pramysłovaja kampanija za ŭłasnyja srodki. Raniej, u saviecki čas, miedsančaści pry zavodach byli raspaŭsiudžanaj praktykaj, ale ŭ 1990‑ia mnohaje źmianiłasia. Kab vyžyć, niekatoryja pradpryjemstvy admaŭlalisia ad nieprafilnych aktyvaŭ (bazy adpačynku, pałacy kultury, dziciačyja sadki i miedycynskija ŭstanovy) i pieradavali ich na bałans biudžetnych arhanizacyj.
Stary budynak treba było častkova razabrać i ŭzmacnić, a taksama prybudavać da jaho niekalki karpusoŭ. U centry pavinny raźmiaścicca terapieŭty i profilnyja śpiecyjalisty (ad hiniekołahaŭ da endakrynołahaŭ), stamatałahičnyja kabiniety, abstalavańnie dla UHD i renthiena i navat MRT-skanier.
— Ciapier padobnaje abśledavańnie miascovyja žychary jeździać rabić u Barysaŭ ci Minsk. Pieršy aparat dla MRT źjavicca ŭ haradskoj balnicy, druhi — u nas. Płanujem vykarystoŭvać jaho kruhłasutačna.
Centr budzie raźličana na 250—300 naviedvańniaŭ za źmienu.
— Dla rabotnikaŭ BIEŁAZa praduhledžana biaspłatnaje absłuhoŭvańnie. Mahčyma, jano budzie raspaŭsiudžvacca i na ich siemji, i na byłych supracoŭnikaŭ. Razhladajem taksama varyjant, što pasłuhami centra na płatnaj asnovie zmohuć karystacca i inšyja haradžanie.
Raboty na abjekcie pačalisia ŭ śniežni minułaha hoda.
Manalitnyja raboty ŭžo zavieršany, kładka — taksama. Na fasadach zmantavany ŭsie mietaličnyja kanstrukcyi. Zaraz idzie ŭstanoŭka voknaŭ, paralelna vykonvajecca čarnavaja ściažka pa pavierchach. Budaŭniki rychtujucca da zimy, kab zapuścić aciapleńnie i nastupnyja try miesiacy zajmacca ŭnutranym azdableńniem.
Interjer miedcentra budzie vytrymany ŭ śvietłaj i spakojnaj hamie: u afarmleńni buduć vykarystany biełyja i šeryja tony, a ŭ kabinietach — miakkija akcenty błakitnaha i zialonaha. Ścieny pakryjuć dekaratyŭnaj tynkoŭkaj.
Na pieršym paviersie raźmieścicca prastorny choł z rehistraturaj, zonaj samazapisu, pamiaškańniem dla afarmleńnia balničnych, bufietam i aptekaj. Na inšych pavierchach raźmieściacca kabiniety daktaroŭ, adździaleńni dyjahnostyki, łabaratoryi, stamatałohija.
Budzie taksama paŭnavartasnaje adździaleńnie reabilitacyi. Tam buduć elektra-, hrazie– i vadalačeńnie, fizijaterapija. Dla tych, kamu pryznačać kurs pracedur, praduhledžany dzionny stacyjanar na 20 łožkaŭ.
Budzie va ŭstanovie i svoj aŭtamabil na vypadak, kali spatrebicca terminova naviedać pacyjenta doma ci, naadvarot, pryvieźci na abśledavańnie. Punkt nieadkładnaj dapamohi tut taksama arhanizujuć.
— Na samim pradpryjemstvie buduć pracavać piać zdraŭpunktaŭ, i za kožnym zamacujuć svajho terapieŭta. Urač budzie vieści ambułatorny pryjom u miedcentry i rehularna vyjazdžać na svoj zdraŭpunkt — vyvučać umovy pracy ŭ cechach. Jamu važna viedać, jakija faktary ŭpłyvajuć na zdaroŭje supracoŭnikaŭ: šumy, vibracyi, pył, elektramahnitnyja vypramieńvańni, doŭhaterminovy stres.
U budynka budzie i adzin pavierch pad ziamloj. Tam zaprajektavany nie tolki techničnyja pamiaškańni, ale i pakoi dla piersanału: harderobnyja, dušavyja.
— U miedyka-sanitarnaj častcy buduć pracavać kala 110 čałaviek. Płanujem pryciahvać śpiecyjalistaŭ u tym liku ź inšych haradoŭ. Zabiaśpiečym ich žyllom: u pradpryjemstva jość ułasny internat. Akramia taho, kampiensujem vydatki na arendu kvatery.
Zdać abjekt u ekspłuatacyju abiacajuć vosieńniu 2026 hoda.
Kamientary