Украінскія падраздзяленні правялі манеўр на пакроўскім кірунку, каб не дапусціць патэнцыйнага акружэння і ўрэгуляваць фронт. Пра гэта 8 снежня паведаміла выданню «Суспільне» крыніца ў Узброеных сілах Украіны, якая ўдзельнічае ў абарончай аперацыі ў Пакроўскай агламерацыі.
Манеўр адбыўся ў раёне сёл Лысаўка і Сухі Яр: падраздзяленні, як паведамляецца, перайшлі на больш выгадныя пазіцыі, што дазволіла прадухіліць магчымае акружэнне і стабілізаваць становішча на фронце. Аперацыя была загадзя падрыхтаваная.
Па інфармацыі аператыўнага камандавання «Усход» за 8 снежня, украінскія вайскоўцы адбілі 53 атакі расійскіх войскаў на розных участках пакроўскага кірунку, уключаючы Новае Шахава, Новы Донбас, Беліцкае, Родзінскае, Чырвоны Ліман, Пакроўск, Грышына, Мірнаград і іншыя населеныя пункты.
У Пакроўску працягваюцца пошукава-штурмавыя дзеянні і ліквідацыя праціўніка ў гарадской забудове. Вораг спрабуе прасочвацца ў паўночную частку горада з дапамогай туману, але ўсе спробы блакуюцца і праціўнік знішчаецца. Каля Мірнаграда украінскія падраздзяленні ўтрымліваюць абарончыя рубяжы і знішчаюць праціўніка на падыходах да горада.
Акрамя таго, арганізаваныя дадатковыя лагістычныя шляхі да Пакроўска і Мірнаграда для бесперабойнага забеспячэння падраздзяленняў усім неабходным.
Каментары