«Не было ні гудзення, ні выбухаў». Сур’ёзныя нестыкоўкі ў версіі РФ пра атаку на рэзідэнцыю Пуціна
Афіцыйныя заявы расійскіх уладаў пра маштабны налёт украінскіх дронаў на рэзідэнцыю Уладзіміра Пуціна на Валдаі выклікаюць сур’ёзныя сумневы. Выданне «Можем объяснить» выявіла шэраг фактаў, якія не супадаюць з карцінай, намаляванай Крамлём.
Першыя пытанні выклікае разыходжанне ў дадзеных розных ведамстваў РФ. Калі кіраўнік МЗС Сяргей Лаўроў заявіў пра 91 дрон, то Мінабароны РФ паведаміла, што над Ноўгарадскай вобласцю быў збіты 41 апарат — 50 нібыта перахапілі над Бранскай і Смаленскай абласцямі.
Сцвярджаецца, што збітыя пад Бранскім дроны ляцелі «ў напрамку Наўгародскай вобласці» — але не ясна, як пра гэта даведаліся: паміж гэтымі рэгіёнамі знаходзяцца Цвярская і Смаленская вобласці. Да таго ж дроны могуць мяняць кірунак палёту для абыходу раёнаў СПА.
Таксама застаецца няясным час атакі. Лаўроў і памочнік прэзідэнта Расіі Юрый Ушакоў казалі пра начны налет, аднак паводле зводак Мінабароны, асноўная маса БПЛА над Наўгародчынай была знішчана раніцай, з 7 да 9 гадзін.
Мясцовыя жыхары нічога не чулі
Журналісты «МО» апыталі 14 жыхароў Наўгародскай вобласці, у тым ліку тых, хто жыве непасрэдна каля Валдая. Ніхто з іх не заўважыў прыкмет маштабнай паветранай бітвы.
«Не было ніякага гудзення гэтай ноччу, выбухаў — тым больш. Калі б было штосьці падобнае, увесь горад гэта б абмяркоўваў сто адсоткаў», — цытуе выданне аднаго з мясцовых жыхароў.
Для горада з насельніцтвам 14 тысяч чалавек пралёт і збіццё амаль сотні дронаў не маглі прайсці незаўважна.
Жыхары Валдая адзначаюць, што заўсёды чуюць нават шум верталётаў, якімі карыстаецца Пуцін, аднак у ноч і раніцу нібыта атакі ў сацыяльных сетках і мясцовых чатах не з’явілася ніводнага паведамлення аб выбухах.
Яшчэ адна нестыкоўка — праца сістэм апавяшчэння. У рэгіёне не абвяшчалася паветраная пагроза, а жыхары не атрымлівалі традыцыйных СМС-папярэджанняў ад МНС.
Для параўнання, падчас папярэдняй атакі на завод «Акрон» у Вялікім Ноўгарадзе мясцовыя жыхары выразна чулі выбухі, і гэта адразу стала галоўнай тэмай у рэгіянальных пабліках.
Прэзідэнт Украіны Уладзімір Зеленскі назваў заявы Лаўрова чарговай хлуснёй. Паводле яго слоў, Расія свядома стварае інфармацыйную глебу, каб апраўдаць будучыя ўдары па ўрадавых будынках у Кіеве.
На гэтым фоне расійская прапаганда актыўна прасоўвае тэму выкарыстання ракет «Арэшнік». Менавіта сёння Мінабароны РФ апублікавала відэа заступлення гэтых комплексаў на дзяжурства ў Беларусі.
У Лагойску пекар адмаўляецца прадаваць свой хлеб пакупнікам, у якіх ёсць сабакі82
Каментары
З іншага боку смешны гэты енк Масквы. Ні на гэта яны разлічвалі на чацвёрты год вайны. Планавалі аднавіць СССР да 27 года, а па выніку не могуць узяць Купянск і плачуцца прэзідэнту ЗША, што Украіна напужала Пуціна сваімі дронамі. Много ходов очка.