Беларусь выводзяць з ізаляцыі не проста так — Зянон Пазняк пра палітыку Трампа

«2025 год — гэта таптанне на месцы»

«Пуцін не хоча міру і ні пры якіх умовах на гэты мір не пойдзе», — адзначае Зянон Пазняк, каментуючы вынікі паездкі пасланнікаў прэзідэнта ЗША Дональда Трампа да кіраўніка Расеі Уладзіміра Пуціна ў Маскву.

Ветэран беларускай палітыкі заўважае: сітуацыя, што складваецца ва Украіне, калі сярод суровай зімы знішчаецца інфраструктура, ідзе на карысць расейцам. І ў пытанні спынення абстрэлаў і дасягнення міру «расейцы будуць стаяць на сваім доўга», калі Захад не пойдзе на радыкальныя захады.

«Магчымасці ёсць — гэта другасныя санкцыі, зніжэнне цэнаў на нафту, газ. Але пакуль на гэта Трамп не ідзе — думае знайсці нейкі ключык. Але нічога з гэтага не будзе — гэта я ўжо дакладна ведаю, бо амерыканцы і еўрапейцы абсалютна не разумеюць Расеі, не разумеюць гэтай ментальнасці, не разумеюць Пуціна — думаюць, што з імі можна дагаварыцца. Ніколі гэтага не будзе», — упэўнены Зянон Пазняк. 

Паводле палітыка, другі варыянт, які можа спыніць Пуціна, — жорсткая дапамога Украіне, то бок узброены канфлікт:

«Што з іх будзе, мы паглядзім. Пакуль што няма нічога. Цэлы 2025 год — гэта ўсё таптанне на адным месцы».

 «Амерыка не хоча быць нянькай»

Пазняк дадае, што, нават калі пэўныя дамоўленасці паміж бакамі будуць дасягнутыя, напрыклад, прыпыненне абстрэлаў крытычнай інфраструктуры, у расейскім стылі — у любы момант гэтыя дамоўленасці паламаць. Навошта тады ЗША схіляюць украінцаў да перамоваў з Масквой, якая відавочна не хоча міру?

«Яны не бачаць іншых варыянтаў. Павінны нешта спрабаваць, рабіць выгляд, што нешта робіцца, але не ведаюць, што рабіць. І не гатовыя да рэзкіх варыянтаў. Тым больш праблема з Іранам, з Газай — шмат іншых узнікае. Для сучаснай амерыканскай палітыкі Украіна дзесьці на трэцім месцы», — разважае Зянон Пазняк. 

Ён нагадвае пра змены ў вонкавай палітыцы ЗША — арыентацыю на дактрыну Манро. На думку палітыка, выступ прэзідэнта Трампа ў Давосе дэманструе паслядоўнасць у схільнасці да гэтай палітыкі. Трамп заявіў, што Еўропа знішчае сама сябе, сваю цывілізацыю, адмовілася ад хрысціянства, не выконвае патрабаванняў у NATO, раззброілася. І ў гэтых умовах Амерыка проста не хоча быць нянькай для ўсяго свету.

«Гэта і ёсць выражэнне дактрыны Манро», — адзначае палітык.

Разам з тым Зянон Пазняк мяркуе, што ў стасунках ЗША з ЕЗ яшчэ не ўсё страчана. 

«Яшчэ будуць старацца наладзіць стасункі з NATO, з Еўропай. Аднак, калі гэтага не будзе, я не бачу перспектывы для еўрапейскай цывілізацыі. Яна проста гіне», — мяркуе Зянон Пазняк.

Пры гэтым, кажа суразмоўца, амерыканцы не могуць развязаць пытання вайны ва Украіне і «хочуць скінуць яго на Еўропу», згадваючы вялікі акіян, які раздзяляе два паўшар’і Зямлі:

«Маўляў, вы жывяце побач з Украінаю, гэта вашыя праблемы — вы павінны пра гэта думаць. Чаму мы павінны за вас усё рабіць? І гэта праўда. NATO фінансуюць ЗША, і Трамп прымусіў іх [еўрапейцаў] неяк звярнуць на гэта ўвагу. За два гады вайна змянілася кардынальна, а еўрапейскія арміі засталіся на ўзроўні Другой сусветнай вайны. Яны ж нічога не робяць! Амерыканцы робяць, а Еўропа — нічога. Ну, збіраюцца, выказваюць заклапочанасць, прымаюць нейкія рашэнні, але няма нічога. І аб гэтым Трамп у Давосе гаворыць».

«Амерыканцы разумеюць, што прайграюць, аддаўшы Беларусь Расеі»

Што датычыць Беларусі і яе стасункаў з ЗША, то Зянон Пазняк мяркуе, што запрашэнне Аляксандра Лукашэнкі ў Раду міру — крок «добры і для народу, і для дзяржавы». Вось як ён абгрунтоўвае сваю думку:

«2024 год, пра Беларусь ужо нідзе не ўспаміналі — яе не было! Пачыналіся перамовы пра мір, і яны маглі б усяляк пайсці. І ў сітуацыі, калі Беларусь ужо не існуе, яна ўжо не палітычны суб'ект, пра яе ніхто не гаворыць, можна і размяняць, як Крым. Гэта вельмі небяспечная зʼява была, разумееце? Таму пазіцыяй нашага руху было адмовіцца ад санкцыяў і «абменьваць» на іх палітвязняў. Еўропа не хоча гэтага рабіць, Байдэн гэтага не мог рабіць — толькі Трамп. І вось ён пачаў палітыку, якой фактычна вывеў Беларусь з ізаляцыі».

Пры гэтым палітык думае, што гэты крок, хоць і добры для Лукашэнкі, усё адно не дае яму легітымізацыі.

Паводле Пазняка, амерыканцы пачалі «прагматычную, рацыянальную палітыку і дасягаюць вынікаў». Раду міру палітык лічыць «вельмі харошай ідэяй» і падкрэслівае: тая прызнаная рашэннем Рады бяспекі ААН. Але навошта Трампу ў гэтым складзе Аляксандр Лукашэнка?

«Амерыканцы цудоўна разумеюць, што Беларусь — гэта стратэгічная тэрыторыя. Яны разумеюць, што, аддаўшы Беларусь Расіі, прайграюць. Яны павінны мець там сваю руку, свой уплыў, інфармацыю. І падыходзяць вельмі акуратна — праз зняцце санкцыяў, вызваленне палітвязняў. А наступнае што адбываецца? У гэты ж час прызнаюць калійныя солі стратэгічна важным прадуктам для Амерыкі. А дзе ёсць калійныя солі? У Беларусі. Значыць, гэта прыцэл», — разважае суразмоўца.

Спадар Зянон мяркуе, што такімі дзеяннямі ЗША плануюць вярнуць беларускі гандаль на заходні рынак, што ў доўгай перспектыве аддаліць краіну ад расейскага ўплыву. Суразмоўца дадае: на такі вынік працуе і ягоны рух.

«Мы ставім задачу [у кантактах з партнёрамі па Беларусі] адмены санкцыяў — гэта адзін момант, выпуск палітвязняў — другі, спыненне рэпрэсіяў — трэці, вельмі важны момант. А чацверты — інвестыцыі. Яны не пойдуць, калі не будуць спыненыя рэпрэсіі: узнікне праблема дыпламатыі. Для нас гэта вельмі важна: мы выцягваем наш народ. Потым трэба будзе адмена блакавання транспарту — павінны хадзіць цягнікі ў Еўропу, павінен быць гандаль. Народ павінен кантактаваць з Еўропай! І фактычна атрымліваецца, што грамадства будзе паступова адцягвацца ад Расеі», — заключыў Зянон Пазняк.

• 34
• 2
• 4
• 14
• 2
• 0
• 0
• 1