«Не раю на Расію ісці: я спаў ад сілы па тры гадзіны за суткі». Дальнабойшчыкі параўноўваюць заробкі і ўмовы працы ў Еўропе і Расіі
Беларускі блогер-дальнабойшчык, які доўгі час чакае працягу дазволу на жыхарства ў Літве, закрануў тэму працы на фуры ў Беларусі і Расіі.
Еўропа vs Расія
У відэа блогер распавядае, што яму нярэдка пішуць у каментарах, маўляў, навошта працаваць у Еўропе, калі ў Беларусі і Расіі даўно такія самыя заробкі, а ўмовы працы, можа, нават і лепшыя.
Сам ён працуе на фірме ў Літве, але мае складанасці з падаўжэннем ДНЖ, таму пакуль сядзіць дома і чакае адказу ад літоўскіх органаў.
Праз гэта ён сам вырашыў пашукаць тыя самыя хвалёныя беларускія і расійскія фірмы, каб пацікавіцца, якія ўмовы і заробкі там прапануюць.
Дальнабойшчык кажа, што мае некалькі знаёмых, якія так працуюць, і адзначае, што ў асноўным аплата ў Расіі ідзе не пасуткавая, як у Еўропе, а ад колькасці кіламетраў.
Аднаму з ягоных знаёмых плацяць па 13—13,5 расійскага рубля за кіламетр. За месяц ён праязджае па 20 тысяч. За месяц ён мае 260—270 тысяч расійскіх рублёў, гэта каля 2900 еўра па цяперашнім курсе. Праўда, некаторыя каментатары не вераць у такі тарыф.
Сам блогер кажа, што ў адной з беларускіх фірм, якая выконвае рэйсы ў Кітай, яму сказалі, што ў сярэднім за суткі працы кіроўца будзе мець каля 60 еўра.
Мужчына сцвярджае, што гэта вельмі мала, бо яшчэ чатыры гады таму, як ён толькі пачынаў працаваць у Еўропе, яму плацілі па 64 еўра на старце, і ўжо на той момант гэта лічылася нізкім заробкам.
У каментарах пад відэа сабралося шмат кіроўцаў, якія выказаліся аб працы на тэрыторыі Расіі.
«Туды я больш не вярнуся»
«У Беларусі тэлефанаваў у фірмы, у мяне адразу пасівелі валасы ад іх умоў», — напісаў адзін з карыстальнікаў.
Іншы піша, што дзеля пенсіі быў вымушаны амаль год адпрацаваць у беларускай фірме і мог бы працаваць далей, але не захацеў. Маўляў, пасля працы ў Польшчы ў яго няма слоў.
«У нас усе шэфы такія бедныя, што часам хочацца купіць бохан хлеба і пакарміць», — дадае дальнабойшчык, які выйшаў на пенсію.
«Калі пачаліся цяжкасці з візамі, паспрабаваў працаваць у Расіі. За год памяняў тры фірмы, кожны раз спадзеючыся на лепшае. Туды я больш не вярнуся. Праца ў Расіі і ў Еўрасаюзе на гэты момант — рэчы несупастаўныя», — піша іншы.
«Інсульт да 40 гадоў ты там заробіш, а не грошы. Едзь у Польшчу і не парся», — раіць яшчэ адзін каментатар.
«Расія і Беларусь — нават не варта пра гэта думаць, умовы і дарогі жудасныя, адпаведна, і зарплата такая ж», — адгаворвае мужчыну калега.
«Каб у Расіі нармальна зарабляць, як мне сказалі, трэба мінімум у дзень 1000 км праехаць, і выходных няма. Схадзіць пазагараць не будзе магчымасці. Пасля Еўропы на Расію — ты будзеш у шоку», — піша іншы дальнабойшчык.
Агулам галоўная прэтэнзія да працы ў Расіі — гэта адсутнасць строгага рэжыму працы і адпачынку. Калі ў Еўропе кіроўцы могуць знаходзіцца за стырном не больш за 9—10 гадзін за суткі, а раз на тыдзень павінны рабіць паўзу на 45 гадзін, то ў Расіі гэтых правіл не прытрымліваюцца.
Натуральна, аплата за кіламетр прабегу, а не за суткі працы, як у Еўропе, матывуе кіроўцаў ездзіць больш.
Найбольшыя заробкі, мяркуючы па каментарах, у тых, хто ездзіць у парных экіпажах і выконвае так званыя экспрэс-рэйсы на Уладзівасток. Праўда, за месяц яны накручваюць па 40 тысяч кіламетраў, паколькі другі кіроўца адпачывае толькі тады, калі першы за стырном.
Многія адзначаюць, што такі рэжым працы хоць і прыносіць большыя грошы, але негатыўна адбіваецца на стане здароўя.
Што прапануюць па вакансіях у Беларусі?
У Еўропе беларускія дальнабойшчыкі без досведу працы могуць разлічваць на зарплату ад 85 еўра за суткі. Дасведчаныя — на 90—100 еўра. Больш маюць кіроўцы аўтавозаў — каля 120—130 еўра за суткі.
У Беларусі сярод вакансій кіроўцаў-міжнароднікаў самыя высокія заробкі абяцаюць у памеры 8500—10 000 рублёў да вылічэння падаткаў. То-бок каля 2150‑2500 еўра на рукі.
Кіроўцам, якія мусяць выконваць рэйсы па маршруце Беларусь — Казахстан — Кітай, абяцаюць 2300—2500 даляраў (каля 2100—2300 еўра) за месяц.
Цяпер чытаюць
У міліцэйскім конкурсе прыгажосці перамагла амапаўка, якая ў 2020 годе разганяла пратэсты47
Каментары