2420 расійскіх вайскоўцаў даслалі свае каардынаты для актывацыі «старлінкаў». Аказалася, што даслалі ўкраінскім хакерам
Заадно ўдалося злавіць 31 украінскага здрадніка, хто гатовы быў актываваць прыладу для расіян на сваё імя.
Украінскія вайскоўцы разам з супольнасцю InformNapalm правялі бліскучую аперацыю: скарыстаўшыся праблемай расіян з сувяззю, яны развялі расійскіх вайскоўцаў на грошы і інфармацыю, паведамляе канал «256 КіберШтурмова Дивізія».
Пасля таго як кампанія Ілана Маска пачала блакаваць працу спадарожнікавай сувязі для расіян, украінцы стварылі сетку фэйкавых ботаў і каналаў нібыта па дапамозе з падключэннем «старлінкаў».
Яны прапаноўвалі паслугі ў актывацыі заблакаваных спадарожнікаў праз падстаўных асоб. Расійскія вайскоўцы павяліся на гэта і пачалі масава скідваць даныя.
Усяго за тыдзень украінцы вывудзілі больш за 2400 звестак пра расійскія «старлінкі» разам з іх дакладнымі каардынатамі — іх абяцаюць канчаткова заблакаваць.
Акрамя каардынат, хакеры атрымалі амаль 6 тысяч даляраў, якія расейцы пераслалі ў якасці аплаты за паслугі.
Бонусам сталі імёны здраднікаў, якія пагадзіліся дапамагаць ворагу з рэгістрацыяй — іх данымі займаюцца спецслужбы.
Каментары