Шрэк, канешне, огр. Але пасля столькіх серый можна і адпачыць.
Шрэк назаўжды (Shrek Forever After)
ЗША, 2010, каляровы, 93 хв, 3-D
Рэжысёр: Майк Мітчэл
Жанр: Анімацыйна-казачныя прыгоды
Адзнака: 6 (з 10)
Зялёны Шрэк, які абзавёўся з Фіёнай трыма дзеткамі, стаміўся ад тлумнай славы і сямейных клопатаў. Дзеці пішчаць, турысты пнуцца за аўтографам, а Кот і Восьлік штодзень лезуць у госці. Шрэк марыць хаця бы дзень пабыць сапраўдным злым ограм і згаджаецца на дамову з хітрым карузлікам Румпельшціцхенам. У выніку небарака трапляе ў альтэрнатыўную рэальнасць, дзе карузлік захапіў усю ўладу, на ограў палююць, а Шрэк нават незнаёмы з любай Фіёнай. На выпраўленне сітуацыі — суткі.
Апошняя серыя пра цельпукаватага волата дэманструе крызіс огра сярэдняга веку, агаломшвае прыгодамі а-ля «Назад у прышлае» і цешыць старымі героямі — у новых формах.
Слынны Кот у ботах да непрыстойнасці атлусцеў, гаваркі Восьлік — схуднеў (але не згубіў балбатлівых здольнасцяў), а Фіёна займела жалезную амуніцыю і цэлую армію ограў-падпольшчыкаў.
Новыя нягоднікі — гнюсны карузлік са зграяй ведзьмаў, што бясконца танчаць на каралеўскае дыскатэцы. На экране – дробна-навязлівая дыктатурка, пакараная героямі, традыцыйныя казачна-фізіялагічныя жарцікі дый ахайныя рамесніцкія прыгоды.
Не, Шрэк, канешне, огр. Але пасля столькіх серый можна і адпачыць.
Памёр палітвязень Валянцін Штэрмер. «Ледзь хадзіў пасля інсульту — а яго кінулі ў ШІЗА»7
Каментары