Мінскі трактарны завод рыхтуе прэзентацыю ўласнага карпаратыўнага талісмана. Яго ўпершыню пакажуць 29 мая — да 80‑годдзя прадпрыемства.
Як паведаміла начальніца аддзела дызайну МТЗ Марына Аніськова, ідэя стварыць унікальнага героя з’явілася пасля аналізу замежнага вопыту: у многіх буйных кампаній і маштабных мерапрыемстваў ёсць свае маскоты. Таму на заводзе надумалі распрацаваць уласны сімвал, які б адлюстроўваў дух прадпрыемства.
Са слоў Марыны Аніськовай, каманда дызайнераў доўга працавала над канцэпцыяй, імкнучыся зрабіць нешта арыгінальнае і небанальнае. Назву персанажа пакуль не раскрываюць, але падкрэсліваюць, што яна абраная невыпадкова.
У Беларусі прамысловыя прадпрыемствы амаль не маюць уласных карпаратыўных талісманаў, і гэта стала дадатковым стымулам для МТЗ стварыць свой. У будучыні канцэпцыю маскота плануюць удасканальваць з улікам водгукаў аўдыторыі.
Летам мінулага года свайго маскота прадставіў іншы беларускі прамысловы гігант — Мінскі аўтамабільны завод.
Каментары