Беларус на мяжы напаў на польскага мытніка, ратуючы кантрабандныя цыгарэты
На беларуска-польскай мяжы на прапускным пункце ў Тарэспалі польскія супрацоўнікі мытна-падатковай службы спынілі кантрабанду больш як у 1,1 тысячы пачкаў цыгарэт. Пры гэтым адбыўся незвычайны інцыдэнт, піша прэс-служба польскага мытнага аддзялення.
Для праверкі мытнікі затрымалі легкавы аўтамабіль Land Rover, якім кіраваў грамадзянін Беларусі. Падчас дэталёвага агляду высветлілася, што ў машыне былі зробленыя спецыяльныя канструкцыйныя змены: пераробленыя цэнтральны тунэль, парогі, падоўжныя элементы і падлога. У гэтых тайніках знайшлі схаваныя цыгарэты без польскіх акцызных марак.
Падчас праверкі ўзнікла небяспечная сітуацыя — кіроўца напаў на супрацоўніка мытнай службы, які выконваў службовыя абавязкі. На месца выклікалі паліцыю, і мужчыну затрымалі.
Супраць яго распачалі крымінальную справу за кантрабанду, а аўтамабіль, спецыяльна прыстасаваны для незаконнай перавозкі тавараў, канфіскавалі.
Акрамя таго, мужчыне выставілі абвінавачанне ў парушэнні недатыкальнасці супрацоўніка дзяржаўнай службы. За такое злачынства ў Польшчы пагражае пакаранне да трох гадоў пазбаўлення волі. Таксама мытнікі звярнуліся ў Памежную службу з просьбай прыняць рашэнне аб выдварэнні беларуса з краіны.
Як рыхтаваўся візіт Ціханоўскай у Кіеў і чаму ён некалькі разоў пераносіўся11
Каментары