Міністр замежных спраў Ірана: Армузскі праліў закрыты толькі для ворагаў, астатнія могуць праходзіць
Міністр замежных спраў Ірана Абас Арагчы ў інтэрв’ю амерыканскаму ліберальнаму тэлеканалу Ms Now расказаў пра сітуацыю ў краіне і вакол Армузскага праліва.
Абас Арагчы заявіў, што ў новага вярхоўнага лідара Ірана Маджтабы Хаменеі нібыта няма ніякіх праблем са здароўем, нягледзячы на чуткі пра яго раненне. Паводле слоў міністра, кіраўнік дзяржавы працягвае выконваць свае абавязкі і будзе рабіць гэта далей.
Гаворачы пра Армузскі праліў, Арагчы адзначыў, што гэты важны марскі шлях у цэлым застаецца адкрытым для суднаходства. Аднак іранскія ўлады не дазваляюць праход праз яго танкерам і суднам тых краін, якія лічаць варожымі. Для астатніх караблёў, па яго словах, рух праз праліў нібыта не абмежаваны.
«Армузскі праліў адкрыты, ён закрыты толькі для танкераў і суднаў, якія належаць нашым ворагам. Астатнія могуць праходзіць, але, вядома, многія аддаюць перавагу не рабіць гэтага з меркаванняў бяспекі. Магу толькі сказаць, што праліў закрыты толькі для амерыканскіх, ізраільскіх суднаў і танкераў», — заявіў Арагчы.
Іранскі міністр таксама пракаментаваў удары па аб’ектах у рэгіёне. Ён сцвярджае, што Іран наносіць удары па амерыканскіх базах і іншых аб’ектах ЗША, якія размяшчаюцца на тэрыторыі суседніх дзяржаў. Пры гэтым Арагчы абвінаваціў Вашынгтон у атаках на цывільныя аб’екты ў Іране, хоць амерыканскі бок гэта неаднаразова адмаўляў.
Ён заявіў, што іранскія вайскоўцы дадуць адказ на амерыканскія ўдары па аб’ектах на востраве Харк. Паводле яго слоў, дзеянні ў адказ могуць быць накіраваныя супраць энергетычнай інфраструктуры на Блізкім Усходзе, якая звязаная з ЗША.
Ён таксама сцвярджае, што ракетныя ўдары па востраве Харк з выкарыстаннем сістэм HIMARS былі нанесеныя з дзвюх лакацый на тэрыторыі Аб’яднаных Арабскіх Эміратаў.
Акрамя таго, кіраўнік іранскага МЗС падкрэсліў, што Расія і Кітай застаюцца для Ірана важнымі стратэгічнымі партнёрамі.
Іран стаў біць па аддзяленнях амерыканскіх банкаў на Блізкім Усходзе
Трамп заклікаў краіны, якія пацярпелі ад закрыцця Армузскага праліва, накіраваць туды вайсковыя караблі
Тэгеран: Тэрыторыя Украіны стала законнай цэллю для Ірана
ХАМАС заклікаў Іран устрымацца ад запуску ракет і беспілотнікаў па краінах Персідскага заліва
ЗША атакавалі востраў Харк у Персідскім заліве. Праз яго праходзіць 90% іранскага экспарту нафты
Эксперт назваў тры сцэнарыі завяршэння вайны супраць Ірана
Каментары