За драмай выратавання барысаўскага ката з дрэва сачылі тысячы людзей
У нейкі момант на дрэве захрасла і гаспадыня.
У сеціве завірусілася відэа, як у Барысаве здымалі ката з дрэва — яно сабрала 7,4 мільёна праглядаў. На відэа звярнуў увагу mlyn.by.
Тыгрыс, так завуць рудога ката, залез на дрэва і не спускаўся. Ягоная гаспадыня Настасся вырашыла прыманіць ката з дапамогай лайфхака: купіла ў аптэцы валяр'янку і выліла пад дрэва. Не дапамагло.
Тады дзяўчына вырашыла забрацца на дрэва сама. Але не толькі ката не зняла, але і сама не змагла злезці. Давялося выклікаць МНС.
Ратавальнікі прыехалі даволі хутка, знялі Настассю. А кот, спалохаўшыся шуму, людзей і аўтавышкі, ірвануў яшчэ вышэй, туды, куды тэхніка не дастане. Ратавальнікі супакоілі дзяўчыну і параілі не перажываць: рана ці позна злезе.
Дзяўчына працягвала чакаць Тыгрыса пад дрэвам. Замовіла прыватную аўтавышку, заплаціла 65 рублёў.
Толькі аўтавышка пад'ехала, а людзі пачаць падбірацца да ката, як Тыгрыс стаў спускацца сам.
Да гэтага моманту ўнізе сабраўся ўжо цэлы натоўп. Некалькі мужчын на ўсялякі выпадак расцягнулі куртку, каб злавіць жывёліну.
Кот спускаўся ўсё ніжэй і ніжэй — і за метр да зямлі рэзка сігануў у бок, абмінуў куртку і праслізнуў паміж ног.
Настасся знайшла Тыгрыса праз некаторы час на суседняй вуліцы — жывога і здаровага.
Каментары