Таленавітага беларускага харэографа злавілі ў Пецярбургу з наркотыкамі
30‑гадовы Мікіта Борыс абышоўся сполахам — калі кіне дурное, то не атрымае ніякага пакарання.
Прыморскі раённы суд Санкт-Пецярбурга 10 сакавіка 2026 года прызнаў 30‑гадовага беларуса, харэографа Мікіту Борыса, вінаватым у незаконным захоўванні наркотыкаў у буйным памеры і прызначыў яму тры гады пазбаўлення волі ўмоўна.
Борыс нарадзіўся ў 1995 годзе ў Дзяржынску. У 2020‑м з адзнакай скончыў Акадэмію рускага балета імя Ваганавай па спецыялізацыі «мастацтва балетмайстра», а ў 2024‑м стаў лаўрэатам расійскай Нацыянальнай тэатральнай прэміі «Музычнае сэрца тэатра» ў намінацыі «найлепшае пластычнае рашэнне» за спектакль «Мядзведзь» у пецярбургскім Тэатры юнага гледача. З 2021 года ён супрацоўнічае з тэатрам эстрады імя Аркадзя Райкіна як рэжысёр па пластыцы і харэограф-пастаноўшчык.
Паводле матэрыялаў справы, харэографа затрымала паліцыя позна ўвечары каля жылога дома — ён сам сказаў супрацоўнікам, што ў заплечніку ў яго мефедрон. Знайшлі два пакецікі: 5,04 г у адным аддзяленні і 0,25 г у другім, разам 5,29 г. Гэта «буйны памер», які прыкладна ў пяць разоў перавышае ніжнюю мяжу.
У СІЗА харэографа не адправілі, адпусцілі дадому чакаць суд.
Сам Борыс расказаў, што ўжывае мефедрон з лета 2025 года і захоўваў яго дома. У дзень затрымання ўзяў наркотык з сабой, сустрэўся са знаёмым, разам зайшлі ў госці, дзе ўжылі рэчыва, а па дарозе ў краму яго і спынілі. На момант затрымання ён быў у стане алкагольнага і наркатычнага ап'янення — суд, аднак, не палічыў гэта абцяжваючай акалічнасцю. У тэлефоне (iPhone 16) слядоў гандлю наркотыкамі не выявілі.
Сярод змякчальных акалічнасцяў суд улічыў прызнанне віны, раскаянне і стан здароўя маці. Кіраўніцтва тэатра характарызуе харэографа станоўча. Пасля затрымання Борыс самастойна стаў на ўлік у нарколага.
Артыкул, па якім яго асудзілі (ч. 2 ст. 228 КК РФ), дапускае да 10 гадоў пазбаўлення волі. Суд прызначыў ніжнюю мяжу — тры гады — ды яшчэ і ўмоўна, з выпрабавальным тэрмінам два гады.
Калі за два гады Борыс не ўляпаецца ў нейкі іншы крымінал, пакаранне не будзе выконвацца, а судзімасць пагасіцца.
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень11
Каментары
Нейкі тэатр мініацюр