Сарвала дах? У Беларусі прадаюць кабрыялет Mercedes 1995 года амаль за $50 тысяч
Легендарны 124‑ы ў кузаве кабрыялет выставілі на продаж у Мінску.
Аўтамабіль 1995 года выпуску. За гэты час ён праехаў 144 тысячы кіламетраў (верым?), пад капотам у яго бензінавы рухавік аб'ёмам 3,2 літра.
Нягледзячы на гады, аўтамабіль выглядае дагледжаным і не мае слядоў карозіі. Шэры скураны салон таксама захаваўся ў даволі добрым арыгінальным стане. А вось руль, па ўсёй бачнасці, перацягнуты ў скуру нанова.
Гэты белы кабрыялет прадавец ацаніў у 47 тысяч даляраў.
Ці сапраўды гэты «Мэрсэдэс» такі каштоўны?
Самае каштоўнае ў гэтым аўто — гэта адкідны дах, бо сам па сабе 124‑ы «Мэрс» — машына вельмі папулярная і, перажыўшы некалькі рэстайлінгаў, выпускалася крыху больш за 20 гадоў.
У астатнім гэты кабрыялет — шараговае аўто, нават нягледзячы на 3,2‑літровы рухавік пад капотам.
Рэч у тым, што гэта быў «Мэрс», выраблены для амерыканскага рынку, а там, у адрозненне ад Еўропы, машыны з 2,2—2,3‑літровым рухавіком нават не прадаваліся, бо амерыканцы любяць магутныя аўто з вялікім аб'ёмам.
Дый прабег амаль 150 тысяч кіламетраў — гэта ўжо не так і мала, каб лічыць машыну надзвычай каштоўнай.
Цікава, што ў Беларусь гэты кабрыялет трапіў толькі сёлета. Дата мытнага афармлення — 1 студзеня 2026 года.
Колькі ён каштаваў прадаўцу?
Да гэтага машына ездзіла ў Каліфорніі, дзе восенню мінулага года яе прадалі на аўкцыёне за $7150, што разам са зборамі аўкцыёну складае каля $8300.
Аўтамабіль прадаваўся без візуальных пашкоджанняў, таму, напэўна, меў нейкія механічныя паломкі.
Падлік выдаткаў на сайце адной з папулярных кампаній, якая займаецца дапамогай у куплі і дастаўцы аўто з ЗША ў Беларусь, паказвае, што з улікам усіх выдаткаў і размытнёўкі на льготніка гэты 124‑ы кабрыялет прыехаў у Беларусь за $23300, калі яго дастаўлялі праз Клайпеду, або за $24900, калі праз Грузію.
Колькі ўласнік уклаў у рамонт аўто і давядзенне яго да таварнага выгляду — невядома. Але з улікам таго, што гэта не нейкі надзвычай рэдкі аўтамабіль, то гэта дакладна не дзясяткі тысяч даляраў.
«Аўто для душы»
У каментарах мяркуюць, што разлік тут ідзе перш за ўсё на кліентаў з Расіі.
Цяперашні ўласнік, як бачым, машынай амаль не карыстаўся, бо, мяркуючы па прабегу на фота ў Беларусі, машына праехала ўсяго каля 150 км.
Сам жа прадавец апісвае гэты кабрыялет як аўто для душы.
Каментары