Сям'я не чакала, што ягады настолькі запатрабаваныя. Але і праца цяжкая.
Мінчане Вікторыя і Арцём сабралі ў лесе чарніцы для сябе — і вырашылі для эксперыменту апублікаваць аб'яву пра продаж ягад. Аказалася, чарніцы вельмі запатрабаваныя. Пра нечаканы прыбытак, мінчане распавялі Myfin.
«А што скажуць людзі?» Баяліся прапаноўваць ягады на продаж
Вікторыі 27 гадоў, і яна індывідуальная прадпрымальніца. Арцёму 31 год, ён займаецца электрыкай у найме. Пара адзначае, што падзарабіць на чарніцах атрымалася цалкам выпадкова.
«Мы прыехалі ў вёску на выхадныя і пайшлі ў лес назбіраць ягад для сябе. Потым без асаблівых чаканняў вырашылі апублікаваць аб'яву пра продаж чарніц у сацсетцы. Адразу ж прыйшоў адзін заказ, а потым і другі. Наш эксперымент хутка выйшаў з-пад кантролю».
Заявіць у інтэрнэце пра продаж было трохі страшна: думка «што ж скажуць людзі» не выходзіла з галавы.
Маладых людзей здзівіў попыт на чарніцы. Заказчыкі хацелі купляць ягады не па два-тры літры, а адразу па пяць. Некаторыя і наогул пісалі з просьбай прадаць дзесяць літраў чарніц. Шмат каму пара адмовіла, бо ягады збіраюць уручную і яны не справіліся б з такімі аб'ёмамі. Чыстыя чарніцы без галінак і лісця прадавалі па 20 рублёў за літр. Пяцілітравае вядро разыходзілася за 100 рублёў з дастаўкай да пад'езда.
«Зараз я бачу аб'явы і з больш нізкай цаной, але гэта няпростая праца, таму прадаваць танней мы не хацелі. Паколькі збіралі не спецыяльнымі камбайнамі, а ўручную, то хуткасць была далёкая ад касмічнай. З сямі раніцы да гадзіны дня ўдавалася набраць усяго пяць-шэсць літраў».
Абсалютна ўсе пакупнікі прыйшлі з Threads. Многіх не задавальняў кошт: адны адзначалі, што на рынку чарніцы прадаюць удвая танней, а іншыя казалі, што не могуць сабе дазволіць купіць адразу пяць літраў за такую цану, але адзін-два возьмуць з задавальненнем.
«Самае складанае — рана прачнуцца!»
Хадзіць у лес герояў навучылі бабулі і дзядулі, да якіх яны, будучы дзецьмі, часта прыязджалі пагасцяваць улетку. З таго часу Вікторыя і ведае ягадныя месцы. Кожныя выхадныя пара ездзіць да дзядулі ў вёску ў Барысаўскім раёне, дзе знаходзяцца правераныя палянкі.
«Я з дзяцінства звыклася: калі плануецца паход у лес, то ўстаць трэба а чацвёртай гадзіне раніцы, а а пятай ужо выйсці з дому, каб паспець сабраць ягады да піку спёкі. Акрамя таго, у бабулі была гаспадарка і агарод. Вядома, трэба было паспець дапамагчы і з гэтым».
Выданне піша, што пакуль пара збірала ягады, усяго за пяцьдзясят метраў ад іх праходзіў лось.
«Гэта не лёгкія грошы»
За пяць дзён пара зарабіла 700 рублёў. Пры гэтым два дні гераіня хадзіла ў лес адна.
Нягледзячы на ягадны поспех, пара вырашыла гэтым летам больш не збіраць чарніцы на продаж — занадта шмат клопатаў у горадзе. На сваёй старонцы ў Threads дзяўчына стварыла галінку, дзе іншыя зборшчыкі пакінулі свае кантакты для патэнцыйных пакупнікоў.
«З'язджаючы з лесу, я сказала яму дзякуй за такія шчодрыя дары. Заробленая сума — неблагая падмога для быту. Калі б мы заняліся зборам ягад усур'ёз і ўзялі адпачынкі на сезон чарніц, то зарабілі б куды больш».
Паводле слоў мінчан, сёлета ў лесе багаты ўраджай чарніц. Галоўнае — ведаць добрыя месцы і не ленавацца. Вікторыя адзначае: ягад хопіць усім.
Ці паўтораць мінчане свой эксперымент у наступным сезоне? Вікторыя не можа даць адназначнага адказу і лічыць, што ўсё будзе залежаць ад ураджаю і жадання, бо гэты спосаб заробку лёгкім дакладна не назваць.
Каментары