Мілей падтрымаў сына Балсанару на выбарах у Бразіліі. Прэзідэнта Лулу ён назваў злодзеем
Бразілія адклікала свайго пасла ў Буэнас-Айрэсе.
Бразілія адклікала свайго пасла ў Буэнас-Айрэсе пасля таго, як прэзідэнт Аргенціны раскрытыкаваў прэзідэнта Бразіліі, назваўшы яго «злодзеем» і «асуджаным», піша Бі-бі-сі.
Хаўер Мілей у нядзелю наведаў мітынг у Сан-Паўлу, прысвечаны старту прэзідэнцкай кампаніі правага кандыдата Флавіу Балсанару — сына былога прэзідэнта краіны Жаіра Балсанару, які знаходзіцца ў турме. Прэзідэнцкія выбары ў Бразіліі павінны адбыцца ў кастрычніку.
Не называючы Луіса Інасіу Лулу да Сілву па імені, Мілей зняважліва выказаўся пра бразільскага прэзідэнта, выступаючы разам з Флавіу Балсанару. Пры гэтым ён заявіў, што менавіта Балсанару — адзіны, хто можа «спыніць Лулу».
Пазней бразільскія дыпламаты заявілі, што аргенцінскі лідар абразіў урад Бразіліі, яе народ і яе дэмакратыю.
У адказ у нядзелю Лула заявіў, што працягне кіраваць краінай «без чыйго-небудзь умяшання».
«У Бразіліі мы не дазваляем нікому ўмешвацца ў нашы ўнутраныя справы», — сказаў ён.
Паводле інфармацыі агенцтва AFP, пасол Бразіліі ў Аргенціне Жуліу Бітэлі павінен быў вярнуцца на радзіму ў перыяд з нядзелі на панядзелак.
Флавіу Балсанару — сын былога прэзідэнта Бразіліі Жаіра Балсанару, якога летась прыгаварылі да больш чым 27 гадоў пазбаўлення волі за падрыхтоўку дзяржаўнага перавароту з мэтай захаваць уладу пасля паразы на папярэдніх выбарах Луле.
Суддзю Вярхоўнага суда Бразіліі Алешандру дэ Мараеса, які разглядаў справу Жаіра Балсанару, Мілей таксама назваў «лысым адкідам».
Раней Мараес адмовіў Мілею ў дазволе наведаць былога прэзідэнта, калі той знаходзіўся пад хатнім арыштам у сталіцы краіны — Бразілія.
У 2018 годзе Лулу быў прыгавораны да 12 гадоў пазбаўлення волі ў сувязі з маштабным карупцыйным скандалам і справай аб атрыманні хабару, аднак быў вызвалены пасля таго, як правёў за кратамі крыху больш за 18 месяцаў.
У 2021 годзе Вярхоўны суд ануляваў прысуды Лулу, і на прэзідэнцкіх выбарах наступнага года ён з невялікай перавагай перамог ультраправага дзейнага прэзідэнта Жаіра Балсанару, атрымаўшы 50,9% галасоў.
Памілаваныя 15 чалавек, сярод якіх 13 палітвязняў15
Каментары