TBM bolš nie adradžaje movy

Ułady nie dali pamiaškańnia dla źjezdu Tavarystva biełaruskaj movy.

30 kastryčnika ŭ Miensku prajšoŭ IX Źjezd Tavarystva biełaruskaj movy imia F.Skaryny. Napiaredadni arhanizataram mierapryjemstva admovili ŭ praviadzieńni źjezdu ŭ Domie litaratara, jaki naležyć prezydentury, dy kaściole Śv. Symona i Aleny. U kaściole spačatku pahadzilisia, ale paśla paprasili prabačeńnia. Cikava, što heta adbyłosia praz dva dni paśla taho, jak u Minjust, jak patrabuje zakanadaŭstva, byŭ dasłany list z zaprašeńniem paprysutničać na schodzie. U vyniku 128 delehatam pryjšłosia ŭščamicca ŭ ciaśniutki ofis Partyi BNF. Ludzi tam siadzieli prosta na hałovach.

U jakaści haściej na forum zaprasili čynoŭnikaŭ dy zamiežnych pasłoŭ. Ale ministry dy staršynia Kanstytucyjnaha sudu ad udziełu ŭ źjeździe admovilisia. A voś pasły ZŠA i Polščy — nie. Džordž Kroł padziakavaŭ siabram TBM za dapamohu ŭ navučańni biełaruskaj movie, dziakujučy čamu jon «siak-tak razmaŭlaje pa-biełarusku».

Spravazdačny dakład star-šyni TBM Aleha Trusava strakacieŭ ad ličbaŭ. Kolkaść biełaruskamoŭnych navučencaŭ za 10 hadoŭ skaraciłasia z 40,7 da 23,8%, kanał STB, što maje 10% biełaruskamoŭnaha viaščańnia, uziaŭ abaviazak padniać planku da 20%. 7000 siabroŭ arhanizacyi rehularna płaciać uznosy, 20 tysiač sympatykaŭ padkidajuć hrošy nierehularna.

Staršynia TBM padziakavaŭ za pavahu da rodnaj movy niekatorym pradpryjemstvam i ŭstanovam: mienskim chleba- i likiora-harełačnym zavodam, «Biełpošcie», Mintranspartu — dy nahadaŭ pra papiaredžańnie ad Minjustu, što ledźvie nie pryviało da vysialeńnia siadziby, dy rasiejskamoŭnaje viaščańnie «Niamieckaj chvali».

Palityki, jak zvyčajna, vykarystoŭvali schod jak mahčymaść vykazacca. Vystupali Piatro Kraŭčanka, Uładzimier Kołas. Vincuk Viačorka, na pravach haspadara pieravysiŭšy rehlament, kazaŭ pra nieparazumieńni z krainami staroj Eŭropy ŭ moŭnym pytańni.

Adziny kandydat ad demsiłaŭ Alaksandar Milinkievič zajaviŭ, što nia varta čakać, pakul źmienicca ŭłada, a zmahacca za movu tut i ciapier. Jon taksama źviarnuŭ uvahu na dvajnyja standarty dziaržaŭnych ŚMI. Uzdymajučy viskat pra ŭcisk nacmienšaściaŭ u Prybałtycy, jany zamoŭčvajuć ucisk pradstaŭnikoŭ tytulnaj nacyi ŭ Biełarusi.

Pavodle vynikaŭ źjezdu byŭ pryniaty stos dakumentaŭ: zvaroty da prezydenta krainy z patrabavańniem biełaruskamoŭnaha viaščańnia na telebačańni, zasnavańnia nacyjanalnaha ŭniversytetu z całkam biełaruskamoŭnym navučańniem, zvarot da Eŭraparlamentu z patrabavańniem viaščańnia na Biełaruś vyklučna pa-biełarusku, listy ŭ prakuraturu, Minadukacyi, vice-premjeru Dražynu pra zakłapočanaść napadam na siamju Łapickich. Kantralavać chod raśśledavańnia spravy daručana Radzie TBM. U.Kołas navat zaklikaŭ pravieści antyfašyscki mitynh.

Aleh Trusaŭ byŭ adzinahałosna pieraabrany na čaćviorty dvuchhadovy termin.

Admietna, što aktyvisty TBM źmianili rytoryku: nia treba adradžać movy, jana j nie pamirała; treba ŭmacoŭvać jaje pazycyi, pašyrać sferu jaje ŭžytku.

• 0
• 0
• 0
• 0
• 0
• 0
• 0
• 0