«Bajsoł» zapuściŭ tradycyjny zbor dla dziaciej palitviaźniaŭ pierad 1 vieraśnia
Płanujuć sabrać 10 tysiač jeŭra z raźliku 100 jeŭra na dzicia.
«Heta dabračynny zbor u padtrymku samych maleńkich — dziaciej biełaruskich palitviaźniaŭ, jakija znachodziacca jak u Biełarusi, tak i za jaje miežami. U našych rukach — mahčymaść realna im dapamahčy», — paviedamlaje «Bajsoł».
Zaznačajecca, što štohod «Bajsoł» atrymlivaje kala dvuchsot zajavak na ŭdzieł u dziciačym školnym zbory, takim jak hety. Pa dapamohu źviartajucca siemji, dzie abodva baćki abo adzin z baćkoŭ znachodziacca ŭ źniavoleńni albo byli asudžanyja pa palityčnych matyvach. U bolšaści vypadkaŭ takija siemji znachodziacca ŭ składanym stanoviščy, a padrychtoŭka dziciaci da škoły stanovicca dla ich dadatkovaj finansavaj nahruzkaj.
Dapamoha 100 jeŭra ŭ miežach Dziciačaha zboru dazvalaje pakryć samyja nieabchodnyja vydatki: nabyć školnyja prynaležnaści i chacia b častku školnaha adzieńnia. Heta prostyja rečy, bieź jakich dziciaci składana adčuvać siabie na roŭnych z adnahodkami. Heta taksama naš sposab pakazać i dzieciam, i darosłym, što pobač jość šmat nieabyjakavych ludziej.
Na kožnaje dzicia va ŭzroście da 16 hadoŭ budzie vypłačana pa 100 jeŭra.
Ahulnaja suma ŭkazanaja z ulikam kamisij banka i płaciežnych sistem.
Zajaŭki na atrymańnie dapamohi prymajucca da 21 žniŭnia ŭklučna.
Chto moža padać zajaŭku na atrymańnie dapamohi?
- siemji palitźniavolenych ź dziećmi, u jakich adzin z baćkoŭ ci abodva znachodziacca ŭ źniavoleńni nie mienš čym try miesiacy (u tym liku na «chimii» z nakiravańniem abo biez);
- byłyja palitźniavolenyja ź dziećmi, vyzvalenyja paśla 1 studzienia 2024 hoda.
Kab atrymać dapamohu, treba zapoŭnić formu. Kali vy chvalujeciesia za vašu biaśpieku, zapaŭniajcie jaje, nie dasyłajučy dakumienty. «Bajsoł» skantaktujecca i ŭdakładnić nieabchodnuju infarmacyju.
Padtrymać zbor
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary