«Ja taju, u abdymkach mocna hałavu hublaju». Vyjšaŭ biełaruskamoŭny letni trek ź virusnym prypievam
Muzyka Uładź Lepiašynski (uladz) vypuściŭ novy trek «ja taju». Lohki, na pieršy pohlad, indzi-pop ź virusnym prypievam, nasamreč raskazvaje pra hłybokaje asabistaje raźvitańnie ź Minskam.
Prezientacyja pieśni prajšła 30 lipienia ŭ varšaŭskim bary Karma Crew.
Heta ŭžo treci trek u solnym prajekcie 29‑hadovaha śpievaka. Da hetaha byŭ miełanchaličny «z taboj» i iraničny fit z Marazmam Arkadzia «cache clip». Jak tłumačyć Uładź u svaich sacsietkach, novy trek hučyć niby pra stasunki ź dziaŭčynaj, ale nasamreč jon pra luboŭ da Minska i stasunki, jakija adbyvalisia tam, a taksama pra raźvitańnie z horadam.
Uładź naradziŭsia ŭ nievialikim horadzie Barań u Viciebskaj vobłaści. Jon vystupaŭ u roznych prajektach. Adzin ź ich — hurt «Lepšy Kvas», dzie jon byŭ frontmienam i hitarystam. Hurt naradziŭsia ŭ 2015 hodzie i źbiraŭ kancertnyja zały na 150 čałaviek. Taksama Uładź zapisvaŭ sumiesnyja treki z LEAR, dzie vystupaŭ nie tolki jak vykanaŭca, ale i ŭ roli muzyčnaha pradziusara. Ciapier ža chłopiec asnoŭnuju ŭvahu nadaje prajektu «Baču ŭpieršyniu».
Novy sinhł «ja taju» byŭ stvorany ŭ suaŭtarstvie z saŭndpradziusaram Illom Faminym. U videa da pieśni Uładź tančyć ź siabrami na vulicach Varšavy.
Jość i varyjant treka ŭ narodnym styli — Uładź lubić ekśpierymienty i ironiju.
Chłopiec pracuje ŭ śfiery videavytvorčaści — zdymaje, mantuje i robić kolerakarekcyju. Hety bekhraund znachodzić adlustravańnie i ŭ jaho muzycy. Naprykład, papiaredniaja pieśnia «cache clip» była pramoj adsyłkaj da prahramy videamantažu — minułyja stasunki tam paraŭnoŭvalisia z tečkaj techničnaha kešu, jaki ty bačyš, ale vykarystać užo nie možaš.
Što da muzyčnaha napaŭnieńnia, sam vykanaŭca ŭ Instagram pryznajecca, što źjaŭlajecca vialikim fanatam papularnaha hurta «Niervy». Słuchačy časta zaŭvažajuć, što jaho styl i padača pieraklikajucca z tvorčaściu Ženi Milkoŭskaha, čamu sam Uładź mocna rady. Pry hetym u jaho płejliście šmat aktualnaj biełaruskaj muzyki, a siarod maładych kaleh jon asabliva vyłučaje prajekty Navalach i Samota, nazyvajučy ich «śviežym podycham» na sučasnaj scenie.
U lutym 2021 hoda muzyka patrapiŭ pad chvalu represij — jaho zatrymali padčas abłavy na padpolny kancert hurta «Raźbitaje serca pacana» na bazie adpačynku pad Smalavičami.
Akramia muzyki i videa, Uładź viadzie Twitch-kanał (ulaadzik.clip), dzie zamiest hulniaŭ ładzić kulturnyja strymy ź biełaruskimi dziejačami — prydumlaje trek z nula sa śpievakom Samota, hatuje mačanku ź Ciociaj Iraj ci bliny pad łajv-set Mandzik.
Ciapier čytajuć
Kolki biełarusaŭ atrymali polskaje hramadzianstva za apošni čas. Ličby ŭražvajuć41
Kamientary