Staŭcie zasłony!

Niahledziačy na svaju kalasalnuju zahružanaść, prezydent paličyŭ za nieabchodnaje asabista pastavić zasłon biezadkaznamu staŭleńniu vadzicielaŭ, piešachodaŭ i pasažyraŭ da biaśpieki na transparcie.

Słuchajučy śpič prezydenta, u dumkach ciešyŭsia za Sieviarynca. Kali b Pašu sudzili za arhanizacyju maršu suprać vynikaŭ referendumu-2004 paśla ŭvodu novych praviłaŭ darožnaha ruchu, pryšyli b nia tolki stvareńnie pieraškodaŭ ruchu transpartu, a jašče i «ruch u ciomny čas sutak pa krai prajeznaj častki bieź śviatłaadbivalnych elementaŭ».

Tut raptam vucha razanuŭ vyraz: «Nieabchodna pastavić žorstki zasłon biezadkaznamu staŭleńniu vadzicielaŭ, piešachodaŭ, pasažyraŭ da biaśpieki na transparcie».

«Pastavić zasłon». Niedzie ja ŭžo heta čuŭ.

Apošnim časam harant majho prava pierachodzić vulicu na zialonaje śviatło tolki tym zajmaŭsia, što tykaŭ tam i siam žorstkija, nadziejnyja i efektyŭnyja zasłony. Padčas vizytu ŭ Biełaviežu zapatrabavaŭ «pastavić zasłon brakańjerstvu». Pry sustrečy z drobnymi kamersantami — uźvieści «efektyŭny zasłon šerym schiemam biznesu, kryminału». U zvarocie da čynoŭnikaŭ — «zasłon usim, chto namierana dezynfarmuje hramadzian pa pryncypovych pytańniach hramadzka-palityčnaha žyćcia». U čas sustrečy z rektarami — «zasłon takim brydkim źjavam, jak chabarnictva z boku ŭniversyteckich supracoŭnikaŭ i sproby padmannym čynam praleźci ŭ VNU». Paličyŭ jon taksama nieabchodnym pastavić «nadziejny zasłon na šlachu hetkich złoŭžyvańniaŭ», jak «uvoz aŭtamabilaŭ z afarmleńniem ich na padstaŭnych asob». Padskočyŭšy na studyju BT — cytuju «Saŭbiełku», — «prezydent žorstka zapatrabavaŭ pastavić zasłon» takim źjavam u mastackaj pradukcyi, jak «hvałt, kroŭ amerykanskich bajavikoŭ, razbeščanaść, amaralnaść».

Pierad nami jaŭna słovazłučeńnie-parazyt — prafesijnaja chvaroba publičnych palitykaŭ. Pryhadajcie kryłaty harbačoŭski vyraz «Praces pajšoŭ» abo leninskaje «bacieńka».

Najbolš prykolnaje — dalejšyja pryhody afaryzmu, jaki naradžajecca na našych vačach i, vidavočna, źjaŭlajecca pijarnaj zbrojaj. Tym bolš što baćkavy zasłony, zdajecca, dziravyja. Padčas vybarčaj kampanii frazu moža vykarystać apazycyja: zapuścić u Internet anekdoty pra Šuryka Zasłonava. Niejak prychodzić Zasłonaŭ da Kube i kaža: «Abiacaju i biaru abaviazak pastavić zasłon dyversijam na čyhuncy». Ale ŭłady zdolnyja pierachapić inicyjatyvu. Było b prykolna, kali b nastupny Ŭsiebiełaruski narodny schod prajšoŭ pad ščyrym lozunham «Pastavim zasłon tak zvanaj svabodzie!».

• 0
• 0
• 0
• 0
• 0
• 0
• 0
• 0