Ksiandzu Łazaru stavicca ŭ vinu pieradača hrošaj «špijonu», pahražaje da 15 hadoŭ turmy

Ksiandzu Uładzisłavu Łazaru stavicca ŭ vinu pieradača hrošaj i materyjalnych kaštoŭnaściaŭ čałavieku, jaki abvinavačvajecca ŭ špijanažy na karyść inšaj dziaržavy.

Pra heta havorycca ŭ paviedamleńni z 54-ha plenarnaha pasiadžeńnia Kanfierencyi katalickich biskupaŭ Biełarusi, što adbyłosia 12 vieraśnia.«Paśla mnohich starańniaŭ i doŭhaha čakańnia siońnia Kanfierencyja katalickich biskupaŭ Biełarusi atrymała pachodziačuju ad dziaržaŭnych orhanaŭ infarmacyju ab zatrymańni ks. Uładzisłava Łazara», — adznačajecca ŭ paviedamleńni.

Ksiondz «sapraŭdy zatrymany orhanami KDB i znachodzicca ŭ SIZA KDB u h. Minsku». Jon abvinavačvajecca pavodle p. 1 art. 356 Kryminalnaha kodeksa (zdrada dziaržavie). Jaho kryminalnaja adkaznaść vyznačajecca p. 6 art. 16 KK (sadziejničańnie ŭ złačynstvie).

«Na zapyt kaściolnaj ijerarchii» było atrymana zapeŭnieńnie, što ŭ dačynieńni da ksiandza «buduć zachoŭvacca ŭsie jaho pravy zhodna z zakanadaŭstvam».

«U bližejšaj budučyni» apostalskamu nuncyju ŭ Respublicy Biełaruś arcybiskupu Kłaŭdya Hudžeroci budzie dadziena mahčymaść asabistaj sustrečy z Łazaram.

Ułady «harantujuć, što kaściolnaja ijerarchija budzie rehularna infarmavana pra vyniki śledstva, jakoje praciahvajecca». «Zhodna z paviedamleńniem dziaržaŭnych uładaŭ hety epizod nie paŭpłyvaje na klimat davieru Respubliki Biełaruś da apostalskaha pasadu i pavahu da katalickaha kaścioła», — adznačajecca ŭ paviedamleńni.

Kanfierencyja katalickich biskupaŭ źviartajecca z zaklikam da viernikaŭ «daručyć Božaj miłasernaści hetuju balučuju prablemu».

Pra zatrymańnie ksiandza stała viadoma praź niekalki dzion paśla taho, jak Alaksandr Łukašenka 26 lipienia paviedamiŭ žurnalistam, što supracoŭnik biełaruskich śpiecsłužbaŭ zatrymany za pracu na zamiežnyja dziaržavy. «My niadaŭna zatrymali adnaho sa zdradnikaŭ, jaki ŭ śpiecsłužbach słužyŭ i jaki byŭ praz pradstaŭnikoŭ katalickaj carkvy źviazany z zamiežnymi dziaržavami, i nie tolki zdavaŭ infarmacyju, ale z-za jaho dziejnaści paciarpieli ludzi, jakija pracujuć za miažoj», — skazaŭ Łukašenka. 29 lipienia infarmacyju pra zatrymańnie ksiandza Łazara paćvierdziŭ pradstaŭnik Rymska-katalickaha kaścioła ŭ Biełarusi.

Ksiondz Uładzisłaŭ Łazar — hramadzianin Biełarusi, vučyŭsia ŭ Hrodzienskaj sieminaryi, zatym u Polščy. U krasaviku hetaha hoda byŭ pryznačany administrataram z pravami probašča parafii Spasłańnia Duchu Śviatoha ŭ Barysavie. Raniej słužyŭ u Mar`inaj Horcy i Rudziensku (Puchavicki rajon Minskaj vobłaści).

Sankcyja p. 1 art. 356 KK praduhledžvaje pazbaŭleńnie voli na termin ad 7 da 15 hadoŭ.

• 0
• 0
• 0
• 0
• 0
• 0
• 0
• 0