Minfin Rasii prapanuje z 2014 hoda admianić naftavyja lhoty Biełarusi
Heta nie častka «kalijnaj vajny», a vynik rezkaha skaračeńnia biudžetnych dachodaŭ u Rasii.
«Režym nadzvyčajnaha skaračeńnia», — tak nazyvaje svoj artykuł ab prapanovach rasijskaha Minfina hazieta «Kommiersant».
Rasija sutyknułasia ź vializnaj prablemaj: biudžetnyja dachody ad nienaftahazavaha siektara ŭ nastupnyja try hady ŭpaduć na 1,7 tryljona rubloŭ. Heta amal 60 miljardaŭ dalaraŭ u pieraliku! Takuju biudžetnuju dzirku treba niečym zatykać. Minfin prapanuje adpaviedna skaracić vydatki.
Skaračeńnie raschodaŭ biudžetu stała temaj śpiecyjalnaha pasiedžańnia z udziełam Uładzimira Pucina, što prajšło ŭ Nova-Aharovie 11 vieraśnia.
Zhodna z płanam rasijskaha ministra finansaŭ Antona Siłuanava, pad skaračeńnie papadzie bolšaść artykułaŭ.
Tolki 16 biudžetnych artykułaŭ nie traplajuć pad abrezku. Siarod ich nazvanyja stypiendyi studentam, piensii vajskoŭcam, zarpłaty, datacyi na vyraŭnoŭvańnie biudžetnaj zabiaśpiečanaści i apłata mižnarodnych abaviazacielstvaŭ. Pad skaroty, zatoje, trapiać dziaržzakupki, dziaržprahrama ŭzbrajeńnia «dy inšyja niesacyjalnyja vydatki».
Adnak prostaha skaračeńnia raschodaŭ zamała. Kab zbałansavać dziaržaŭnyja finansy, płanujecca pavialičyć PDV i padatki na naftu.
Nafta j haz zastajucca, faktyčna, adzinaj krynicaj hrošaj dla Rasii. Takim čynam, kraina, jak i ŭ 1980-ja, budzie całkam zaležać ad kanjunktury suśvietnych cenaŭ na enierhanośbity.
Biełarusi asabliva datyčyć toje, što Minfin Rasii prapanuje ŭ kompleksie zachadaŭ taksama mabilizacyju «dachodaŭ za košt ŭrehulavańnia pytańnia ź biaspošlinnymi pastaŭkami rasijskaj nafty dziaržavam Mytnaha sajuza».
Naftu Rasija pastaŭlaje tolki ŭ Biełaruś, Kazachstan maje dosyć ułasnaj syraviny. Takim čynam, hetaja źmiena budzie datyčyć tolki našaj krainy.
Ad hetaj prapanovy biudžet Rasii raźličvaje atrymać bolš za 7 miljardaŭ dalaraŭ za try hady, prykładna 2,4 młrd dalaraŭ štohod.
«Da niadaŭniaha času hetyja srodki razhladalisia jak płata za ŭdzieł Biełarusi ŭ Mytnym sajuzie, — piša „Kommiersant“. — U vypadku zaćviardžeńnia prapanovy ŭ biudžecie hetyja srodki apynucca ŭžo niedastupnymi dla dypłamatyčnych manieŭraŭ z Alaksandram Łukašenkam — los Mytnaha sajuza, jak i Jeŭrazijskaj ekanamičnaj prastory, u hetym vypadku, vidać, pavinien vyklikać pytańni».
Biełaruś naŭrad ci zastaniecca ŭ rasijskaj śfiery ŭpłyvu, kali Maskva admienić naftavyja i hazavyja datacyi.
Zrešty, najaŭnaść biełaruskaha naftavaha afšoru zanadta vyhadnaja rasijskim čynoŭnikam i naftavikam. Tamu, jak śviedčyć niadaŭni vizit kiraŭnika «Rośniefti» Ihara Siečyna ŭ Minsk, u pytańni admieny naftavych ilhot rasijski Minfin moža nikoli nie dabicca svajho.
Ciapier čytajuć
Unikalnyja zdymki budaŭnictva Staroha mosta ŭ Hrodnie. Chto fatahrafavaŭ niebiaśpiečnyja kiesony, u jakich ludzi ryzykavali na dnie Niomana, kab pastavić apory? ŠMAT FOTA77
Kamientary